దీపావళి ముందు మహారాష్ట్ర FDA దాడులు: 17,824 కిలోల నాసిరకం ఆహారం స్వాధీనం

దీపావళి పండుగ నేపథ్యంలో మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) రాష్ట్రవ్యాప్తంగా చేపట్టిన మెరుపు దాడుల్లో 17,824 కిలోల నాసిరకం ఆహార పదార్థాలు స్వాధీనం అయ్యాయి. వాటి విలువ సుమారు ₹63 లక్షలకు పైగా ఉంటుందని అధికారులు అంచనా వేస్తున్నారు.

గత మూడు రోజులుగా రాష్ట్రంలోని ఏడు డివిజన్ల పరిధిలో 73 ప్రధాన వ్యాపార సంస్థలపై ఆకస్మిక తనిఖీలు నిర్వహించారు. నిబంధనలు ఉల్లంఘించిన 43 సంస్థల లైసెన్సులు, రిజిస్ట్రేషన్లను రద్దు చేశారు. నాగపూర్‌లో అత్యధికంగా 18 సంస్థలపై, నాసిక్‌లో 9, గ్రేటర్ ముంబైలో 5 ఫుడ్ కంపెనీలపై చర్యలు తీసుకున్నారు.

జాతీయ రహదారులపై కూడా తనిఖీలు చేపట్టి అక్రమంగా తరలిస్తున్న 3,935 కిలోల స్వీట్లను స్వాధీనం చేసుకున్నారు. ఈ స్వీట్లను పరిశుభ్రత ప్రమాణాలు లేకుండా, ఎలాంటి లైసెన్స్ లేకుండా తయారు చేసినట్లు గుర్తించారు.

దీపావళి సమయంలో స్వీట్లు, ఇతర ఆహార పదార్థాల డిమాండ్ పెరగడంతో FDA ప్రత్యేక నిఘా ఏర్పాటు చేసింది. స్వీట్లు, ఖోవా, మావా, పనీర్, డ్రై ఫ్రూట్స్, వంట నూనె వ్యాపారులపై తనిఖీలను ముమ్మరం చేసింది. పండుగల పేరుతో ప్రజల ఆరోగ్యానికి హాని కలిగిస్తే కఠిన చర్యలు తీసుకుంటామని అధికారులు హెచ్చరించారు.