హైదరాబాద్‌లో స్వీట్ల తయారీ కేంద్రాలపై ఫుడ్ సేఫ్టీ దాడులు, పలు యూనిట్లు మూసివేత

హైదరాబాద్‌లో స్వీట్ల తయారీ కేంద్రాలపై తెలంగాణ ఫుడ్ సేఫ్టీ అధికారులు ఏకకాలంలో తనిఖీలు నిర్వహించారు. ఈ దాడుల్లో 14 ప్రత్యేక బృందాలు పాల్గొన్నాయి. పండుగ సీజన్ నేపథ్యంలో స్వీట్ల నాణ్యతపై అధికారులు దృష్టి పెట్టారు.

తనిఖీల్లో పలు కేంద్రాలు అపరిశుభ్ర వాతావరణంలో స్వీట్లు తయారు చేస్తున్నట్టు గుర్తించారు. కొన్ని యూనిట్లు FSSAI లైసెన్స్ లేకుండానే నడుస్తున్నాయి. మరికొన్ని గడువు ముగిసిన లైసెన్స్‌తోనే వ్యాపారం కొనసాగిస్తున్నట్టు అధికారులు తెలిపారు.

తయారీకి నాలుగు రోజుల ముందే తయారీ తేదీ ముద్రిస్తున్న ఘటనలు కూడా కనిపించాయి. ఇతర ప్రాంతాల నుంచి తెచ్చే పాలకోవా నిల్వలో కోల్డ్ చైన్ నిబంధనలు పాటించడం లేదని తేలింది.

దీంతో కొన్ని తయారీ కేంద్రాలను మూసివేశారు. మరికొన్ని కేంద్రాలకు షోకాజ్ నోటీసులు జారీ చేసేందుకు అధికారులు సిద్ధమయ్యారు.

కరీంనగర్‌లోనూ ఫుడ్ సేఫ్టీ అధికారులు తనిఖీలు చేశారు. ఓ KFC సెంటర్‌లో ఆహార పదార్థాల నమూనాలు సేకరించి ల్యాబ్‌కు పంపారు. కుళ్లిపోయిన ఆహారం, రోజుల తరబడి నిల్వ ఉంచిన పదార్థాలు, నాసిరకం పదార్థాలు, కల్తీ నూనెలు వాడుతున్నట్టు గుర్తిస్తే కఠిన చర్యలు తీసుకుంటామని అధికారులు హెచ్చరించారు.