దీపావళి 2026: హైదరాబాద్‌లో 1,150 టపాసుల దుకాణాలకు తాత్కాలిక అనుమతులు

దీపావళి సీజన్‌లో హైదరాబాద్ నగరవ్యాప్తంగా 1,150 టపాసుల దుకాణాలకు తాత్కాలిక అనుమతులు మంజూరు అయ్యాయి. నిబంధనలు పాటించని మరో 60 దరఖాస్తులను అధికారులు తిరస్కరించారు.

హైదరాబాద్ డిస్ట్రిక్ట్ ఫైర్ ఆఫీసర్ వెంకన్న తెలిపిన ప్రకారం, లైసెన్సుల కోసం దరఖాస్తులు ఆన్‌లైన్ విధానంలోనే స్వీకరించారు. పాఠశాలలు, కళాశాలల ఓపెన్ గ్రౌండ్లు, ఖాళీ ప్రదేశాల్లోనే టపాసుల విక్రయాలకు అనుమతి ఇచ్చారు.

ఒక క్లస్టర్‌లో 100 దుకాణాలకు మించకూడదని అధికారులు నిబంధన విధించారు. వరుసగా ఉన్న దుకాణాల మధ్య కనీసం 3 మీటర్ల దూరం ఉండాలి. దుకాణాలను ఎదురెదురుగా ఏర్పాటు చేయకూడదని సూచించారు.

ప్రతి షాప్ వద్ద 200 లీటర్ల నీటి డ్రమ్, ఇసుక కలిగిన బకెట్లు, రెండు ఫైర్ ఎక్స్‌టింగ్విషర్లు, రెండు ఫైర్ బకెట్లు ఉంచాలి. నో స్మోకింగ్ బోర్డులు పెట్టాలి. అనధికారిక లోకల్ క్రాకర్స్ విక్రయించకూడదు. లైసెన్స్ ఉన్న తయారీదారుల నుంచి కొనుగోలు చేసిన బాణసంచాను మాత్రమే విక్రయించాలి.

నిబంధనలు ఉల్లంఘిస్తే తాత్కాలిక లైసెన్సులు రద్దు చేసి చట్టపరమైన చర్యలు తీసుకుంటామని అధికారులు హెచ్చరించారు. క్షేత్రస్థాయిలో కొన్ని చోట్ల నిబంధనల అమలు ప్రశ్నార్థకంగా ఉంది. ఫైర్ సేఫ్టీ ఏర్పాట్లపై ఆందోళన వ్యక్తమైంది. పండుగ సమయంలో ప్రజలు వ్యక్తిగత భద్రతపై అప్రమత్తంగా ఉండాలని అధికారులు సూచించారు.