విజయవాడ గుణదలలో రూ.98.68 కోట్ల రైల్వే ఓవర్ బ్రిడ్జికి శంకుస్థాపన

విజయవాడ గుణదలలో రూ.98.68 కోట్లతో నిర్మించే రైల్వే ఓవర్ బ్రిడ్జి (ROB)కి ఎంపీ కేసినేని చిన్ని, ఎమ్మెల్యే బొండా ఉమా శంకుస్థాపన చేశారు. 920 మీటర్ల పొడవు ఉండే ఈ ROB ను 18 నెలల్లో పూర్తి చేస్తామని ఎమ్మెల్యే తెలిపారు.

గుణదలలో లెవల్ క్రాసింగ్ (LC) నంబర్ 316ను పరిష్కరించాలని స్థానికులు 20 ఏళ్లుగా డిమాండ్ చేస్తున్నారని ఎంపీ పేర్కొన్నారు. ఈ డిమాండ్ మేరకే ROB ప్రాజెక్టు చేపట్టామని, ఇందుకోసం రైల్వే మంత్రి, DRM వంటి ఉన్నతాధికారులతో చర్చలు జరిపామని చెప్పారు. ఎనిమిది శాఖల మధ్య సమన్వయం సవాలుతో కూడుకున్నది. అయినా ప్రాజెక్టును సాధించామని వివరించారు.

అలాగే, ఏలూరు రోడ్డు-గుణదలను కలిపే LC నంబర్ 8 నిర్మాణం నెల రోజుల్లో ప్రారంభిస్తామని, దాన్ని రెండేళ్లలో పూర్తి చేస్తామని ఎంపీ తెలిపారు. విజయవాడ పార్లమెంట్ పరిధిలో అమృత్ భారత్ పథకం కింద మూడు రైల్వే స్టేషన్లను అభివృద్ధి చేయనున్నట్లు కూడా ఆయన ప్రకటించారు.