నల్గొండలో ఒకే ఇంట్లో నలుగురు హత్య: నిందితుడు అస్లాం, భార్య అరెస్ట్

నల్గొండలోని తెలంగాణ కాలనీలో ఒకే ఇంట్లో నలుగురు హత్యకు గురయ్యారు. బాధితులు స్థానిక పాఠశాల ఉపాధ్యాయురాలు హసీనా, ఆమె భర్త సుల్తాన్, కుమారుడు ముజామిల్, కుమార్తె అఫోరాలుగా గుర్తించారు.

పోలీసుల విచారణలో నిందితుడు అస్లాం (వరుసకు కుటుంబానికి అల్లుడు) నేరానికి పాల్పడినట్లు తేలింది. అస్లాం అప్పుగా ఇచ్చిన డబ్బులు తిరిగి ఇవ్వకపోవడంతో కక్షగట్టాడని, హత్యలు ఎలా చేయాలో యూట్యూబ్‌లో చూసి పథకం వేశాడని పోలీసులు తెలిపారు.

తెల్లవారుజామున ఇంట్లోకి చొరబడిన నిందితుడు కత్తితో నలుగురిని నరికి చంపాడు. మృతదేహాలపై దుప్పట్లు కప్పి, ఇంట్లో ఉన్న ఐదు తులాల బంగారం, ఆస్తి పత్రాలు తీసుకెళ్లాడు.

నాలుగు రోజులుగా ఇంటికి తాళం వేసి ఉండటం, దుర్వాసన రావడంతో చుట్టుపక్కల వారు పోలీసులకు సమాచారం ఇచ్చారు. పోలీసులు వచ్చి తలుపులు బద్దలు కొట్టి చూడగా నలుగురు కుళ్లిన మృతదేహాలు కనిపించాయి. ఈ ఘటనలో నిందితుడు అస్లాం‌ను, సహకరించిన అతని భార్యను పోలీసులు అరెస్టు చేశారు. కేసు నమోదు చేసి దర్యాప్తు చేస్తున్నారు.