గచ్చిబౌలిలో జులై 1 నుంచి 90 రోజుల ట్రాఫిక్ ఆంక్షలు; ఫ్లైఓవర్ నిర్మాణం కారణంగా డీఎల్ఎఫ్ రోడ్డు మూసివేత

గచ్చిబౌలిలో రేపటి (జులై 1) నుంచి 90 రోజుల పాటు ట్రాఫిక్ ఆంక్షలు అమల్లోకి రానున్నాయి. టీపీఎల్ ఐటీ జంక్షన్ వద్ద మల్టీలెవల్ ఫ్లైఓవర్ నిర్మాణ పనులు జరుగుతున్న నేపథ్యంలో సైబరాబాద్ ట్రాఫిక్ పోలీసులు ఈ నిర్ణయం తీసుకున్నారు.

డీఎల్ఎఫ్ గేట్ 1 నుంచి రోడ్డును పూర్తిగా మూసివేస్తున్నారు. లింగంపల్లి వైపు నుంచి వచ్చే వాహనదారులు డీఎల్ఎఫ్ వెళ్లడానికి ప్రత్యామ్నాయ మార్గాలను ఉపయోగించాలి. వీరు గచ్చిబౌలి జంక్షన్ వరకు వచ్చి అక్కడ నుంచి రాడిసన్ హోటల్ మీదుగా డీఎల్ఎఫ్ చేరుకోవాలి. కొండాపూర్ నుంచి వచ్చేవారు అంజయ నగర్ వద్ద యూటర్న్ తీసుకొని డీఎల్ఎఫ్ జంక్షన్ చేరుకోవాలి. విప్రో జంక్షన్ నుంచి వచ్చేవారు నానక్రామ్గూడ, ఓఆర్ఆర్ మీదుగా పీజీఆర్ ఫ్లైఓవర్ ద్వారా వెళ్లాలి.

సైబరాబాద్ ట్రాఫిక్ ఏసీపీ చంద్రశేఖర్ మాట్లాడుతూ, ప్రాజెక్టు వేగంగా పూర్తి చేయడానికి ఈ ఆంక్షలు అవసరమని తెలిపారు. ఇప్పటికే స్తంభాలు ఎత్తు పెరిగాయని, భద్రత దృష్ట్యా ట్రాఫిక్ మళ్లింపు చేపట్టినట్లు వివరించారు. మూడు నెలల్లో ఫ్లైఓవర్ నిర్మాణం పూర్తి చేయాలని లక్ష్యంగా పెట్టుకున్నామన్నారు.

ఐటీ కారిడార్లో రద్దీ ఎక్కువగా ఉండే ఉదయం, సాయంత్రం పీక్ అవర్స్లో ట్రాఫిక్ నియంత్రణకు ఏర్పాట్లు చేశారు. గూగుల్ మ్యాప్స్‌లో రూట్ బ్లాక్ అప్‌డేట్ చేస్తామని ఏసీపీ తెలిపారు. ఐటీ సంస్థల యాజమాన్యాలు ఉద్యోగులను ఒకేసారి విడిచిపెట్టకుండా స్టగ్గర్డ్ టైమింగ్స్ అమలు చేయాలని, ఉద్యోగులు ముందుగానే బయలుదేరాలని సూచించారు.