సాయి కృష్ణ మృతి కేసు: స్నేహితుడు సురేష్ అరెస్ట్, హెడ్ కానిస్టేబుళ్లపై ప్రొడక్షన్ మెమో

గడే సాయి కృష్ణ మృతి కేసులో సిట్ (ప్రత్యేక దర్యాప్తు బృందం) విచారణను వేగవంతం చేసింది. ఈ కేసులో సిట్ సిఐ నాగరాజు స్నేహితుడు సురేష్ ను అరెస్ట్ చేసింది. కృష్ణలంక పోలీస్ స్టేషన్‌కు చెందిన హెడ్ కానిస్టేబుల్స్ అశోక్, నానీలపై కోర్టులో మెమో దాఖలు చేసింది.

సురేష్ ను విచారించగా, సాయి కృష్ణ విషయంలో తనకు ఏమీ తెలియదని చెప్పాడు. కానీ అధికారులు 'ఏ తప్పు చేయలేదంటే ఎందుకు పారిపోయావు' అని ప్రశ్నించడంతో మౌనం వహించాడు. సురేష్ ఇచ్చిన స్టేట్మెంట్ ఆధారంగా దర్యాప్తు మరింత ముమ్మరం చేశారు.

అశోక్, నానీలను నిందితులుగా చేర్చిన సిట్, వారిని అదుపులోకి తీసుకుని హాజరుపరచాలని సౌత్ ఏసిపి కి ప్రొడక్షన్ మెమో ఇచ్చింది. డ్యూటీకి రాకపోవడంతో వీరిద్దరినీ సస్పెండ్ చేశారు. వారి కోసం ప్రత్యేక బృందాలు గాలిస్తున్నాయి.

అలాగే, సిఐ నాగరాజుకు సన్నిహితులుగా ఉన్న మరో 10 మంది పోలీసులను సిట్ గుర్తించింది. సాయి కృష్ణను మే 5న ప్రకాశం జిల్లా మార్కాపురం నుంచి నాన్ బెయిలబుల్ వారెంట్లపై తీసుకొచ్చిన టాస్క్ ఫోర్స్ ఎస్ఐ నవీన్, కానిస్టేబుళ్లు కృష్ణ, రాంబాబు, బాబురావు‌లను ఇప్పటికే విచారించారు.

పర్యవేక్షణ లోపంపై సౌత్ ఎసిపి మానసను కూడా సిట్ విచారించింది. సాయి కృష్ణ అదృశ్యం ఎప్పుడు తెలిసింది, అంతర్గత విచారణ ఎందుకు చేయలేదు అనే ప్రశ్నలు సంధించినట్లు తెలుస్తోంది.

మరోవైపు, సాయి కృష్ణ తల్లి విజయలక్ష్మి హైకోర్టులో దాఖలు చేసిన హెబియస్ కార్పస్ పిటిషన్ విచారణ త్వరలో జరగనుంది. విచారణ వివరాలు కోర్టుకు సమర్పించేందుకు సిట్ అధికారులు డైరెక్టర్ ఆఫ్ ప్రాసిక్యూషన్ తో సమావేశమై న్యాయపరమైన అంశాలపై చర్చించారు.

ఈ కేసు విచారణ కొనసాగుతోంది. అశోక్, నానీలను పట్టుకోగలిగితే మృతదేహం ఆచూకీపై మరింత సమాచారం లభ్యమయ్యే అవకాశం ఉంది.