గద్వాల BC కళాశాల వసతి గృహంలో 130కి 230 మంది విద్యార్థులు

జోగులంబా గద్వాల జిల్లాలోని BC కళాశాల వసతి గృహంలో 130 మందికి సరిపడే సౌకర్యాల్లో ప్రస్తుతం 230 మంది విద్యార్థులు ఉంటున్నారు. 1993లో నిర్మించిన ఈ భవనం ఇప్పుడు శిథిలావస్థలో ఉంది.

భవనం పైకప్పు పెచ్చులు ఊడిపోతున్నాయి. నాలుగు గదులు కూలిపోయే పరిస్థితి ఉందని విద్యార్థులు చెప్తున్నారు. అయినా అధికారులు మరమ్మతులపై దృష్టి పెట్టడం లేదని విమర్శలు వినిపిస్తున్నాయి. హాస్టల్‌లో మొత్తం నాలుగు గదులు, ఎనిమిది మరుగుదొడ్లు మాత్రమే ఉన్నాయి.

తాగునీటి సౌకర్యం లేకపోవడంతో రోజూ బయట నుంచి 40 క్యాన్ల నీరు కొనుగోలు చేస్తున్నారు. ఇంటర్, డిగ్రీ, డిప్లొమా, ఐటీఐ చదివే విద్యార్థులు ఇక్కడ ఉంటున్నారు. ఒకే గదిలో దాదాపు 50 మంది విద్యార్థులు నేలపై పడుకుంటున్నట్టు విద్యార్థులు తెలిపారు.

వర్షం పడితే పైకప్పు నుంచి నీరు కారుతోంది. దుప్పట్లు తడిసిపోతున్నాయి. గోడల పెయింట్ ఊడిపోతోంది. భవనంలోనే నిత్యవసర సరుకులు నిల్వ చేయడం, వంట చేయడం జరుగుతోంది. ఈ సమస్యను కలెక్టర్ సహా పలువురు అధికారులకు తెలియజేసినా పరిష్కారం రాలేదని విద్యార్థులు చెప్తున్నారు.

గత సంవత్సరం వంట గది వెనుక భాగం కూలిపోయింది. ఆ సమయంలో అక్కడ ఎవరూ లేకపోవడంతో ప్రమాదం తప్పిందని విద్యార్థులు తెలిపారు. ప్రస్తుత స్థలంలోనే కొత్త భవనం నిర్మించాలని వారు ప్రభుత్వాన్ని కోరుతున్నారు. విద్యార్థుల తల్లిదండ్రులు ఆందోళన వ్యక్తం చేస్తున్నారు. ఈ అంశంపై అధికారుల స్పందన రావాల్సి ఉంది.