మీర్పేటలో కుటుంబ కలహాల కారణంగా ఇద్దరు మహిళల కత్తిపోట్ల హత్య

హైదరాబాద్‌లోని మీర్పేట్ పోలీస్ స్టేషన్ పరిధిలో ఇద్దరు మహిళలను కత్తితో పొడిచి చంపారు. సాయి విహార్ కాలనీలో జరిగిన ఈ దాడిలో మరో వ్యక్తి తీవ్రంగా గాయపడ్డారు.

షరీఫ్ నగర్‌కు చెందిన షేక్ మహమ్మద్ సిద్దీకి, అతని భార్య నూర్ బేగం మధ్య కొంతకాలంగా కుటుంబ వివాదాలు ఉన్నాయి. భర్త వేధింపులు తట్టుకోలేక నూర్ బేగం మీర్పేట్‌లోని సాయి విహార్ కాలనీలో ఉన్న తన తల్లి ఇంటికి వచ్చేసింది. ఈ నేపథ్యంలో సిద్దీకి అత్తగారి ఇంటికి చేరుకుని కత్తితో దాడి చేశాడు.

ఈ దాడిలో అతని అత్త (భార్య తల్లి), బావమరిది భార్య రేష్మ అక్కడికక్కడే మృతి చెందారు. వారిని కాపాడేందుకు ప్రయత్నించిన బావమరిది యూసఫ్‌కు తీవ్ర గాయాలయ్యాయి. ఆయన ప్రస్తుతం ఆసుపత్రిలో చికిత్స పొందుతున్నారు.

పోలీసుల విచారణలో హత్యలకు కారణం వెల్లడైంది. సిద్దీకి తన బావమరిది భార్య వరసకు చెల్లెలైన మరో మహిళతో అక్రమ సంబంధం ఉందని పోలీసులు తెలిపారు. దీనిపై భార్య, కుటుంబ సభ్యులు గట్టిగా నిలదీశారని పోలీసులు చెప్పారు. భార్య పోలీసులకు ఫిర్యాదు చేసిన రెండు గంటల వ్యవధిలోనే ఈ హత్యలు జరిగాయి.

ఘటన తర్వాత నిందితుడు సిద్దీకి పరారయ్యాడు. అతని కోసం మీర్పేట్ పోలీసులు ప్రత్యేక బృందాలను ఏర్పాటు చేశారు. మొబైల్ సిగ్నళ్లు, సీసీటీవీ ఫుటేజీ ఆధారంగా గాలింపు కొనసాగుతోంది. ఈ కేసును షంషాబాద్ డీసీపీ రాజేష్, అడిబట్ల ఏసీపీ ప్రదీప్ కుమార్ రెడ్డి పర్యవేక్షిస్తున్నారు. కొన్ని గంటల్లోనే నిందితుడిని పట్టుకుంటామని పోలీసు ఉన్నతాధికారులు తెలిపారు.