రాష్ట్రవ్యాప్తంగా వినాయక నిమజ్జనాలు; జగిత్యాలలో యువకుడు మృతి

రాష్ట్రవ్యాప్తంగా వినాయక నిమజ్జనాలు భక్తిశ్రద్ధలతో కొనసాగాయి. పలు జిల్లాల్లో శోభాయాత్రలు, కోలాటాలు, లడ్డు వేలం కార్యక్రమాలు నిర్వహించారు.

రంగారెడ్డి జిల్లా సరూర్ నగర్ వెంకటేశ్వర కాలనీలో మట్టి వినాయకుడి విగ్రహ నిమజ్జనం జరిగింది. మహిళలు, యువత కోలాటం ఆడుతూ ఊరేగింపులో పాల్గొన్నారు. సిద్దిపేట జిల్లా మిర్దొడ్డిలోని కస్తూర్బా గాంధీ బాలికల విద్యాలయంలో విద్యార్థులు నిమజ్జన కార్యక్రమం నిర్వహించారు.

నిర్మల్‌లో గణేష్ నిమజ్జన శోభాయాత్రకు పోలీసులు పటిష్ట భద్రత ఏర్పాటు చేశారు. జిల్లా ఎస్పీ జి. జానకి శర్మిల ఆధ్వర్యంలో సుమారు 700 మంది పోలీస్ సిబ్బంది బందోబస్తు విధులు నిర్వహించారు. మంచిర్యాల జిల్లా మందమర్రి మార్కెట్ ప్రాంతంలో ఏర్పాటు చేసిన భారీ గణనాథుడికి వీడుకోలు పలికారు. ఈ కార్యక్రమం మంత్రి వివేక్ వెంకటస్వామి ఆధ్వర్యంలో జరిగింది. మంచిర్యాల రామనగర్ విద్యుత్ కార్యాలయం ఆవరణలో ఏర్పాటు చేసిన వినాయకుడిని అధికారులు పూజలు చేసి నిమజ్జనం చేశారు.

పెద్దపల్లి జిల్లా మందనిలో రెండో రోజు గణేష్ నిమజ్జనాలు జరిగాయి. భజనలు, సంకీర్తనలు, నృత్యాలు, కోలాటాల మధ్య శోభాయాత్రలు కొనసాగాయి. జగిత్యాలలో ఎమ్మెల్యే డాక్టర్ సంజయ్ కుమార్, చైర్‌పర్సన్ వాణి ఆధ్వర్యంలో జరిగిన వేడుకల్లో పాల్గొన్నారు. గోవిందుపల్లెలో ఒక ముస్లిం యువకుడు గణేష్ లడ్డు వేలంలో పాల్గొని రూ.70,000కు దక్కించుకున్నాడు.

తులసీనగర్‌లో నిమజ్జన శోభాయాత్ర ప్రారంభంలో జయంత అనే యువకుడు నృత్యం చేస్తూ పడిపోయాడు. అక్కడే ఉన్న పోలీసులు CPR చేసి ఆసుపత్రికి తరలించారు. అప్పటికే మృతి చెందినట్లు వైద్యులు తెలిపారు. భద్రాచలంలోని గోదావరి నది తీరంలో గణపతి విగ్రహాల నిమజ్జనాలు కొనసాగాయి. ఖమ్మంలోని రేవతి సెంటర్‌లో ప్రతిష్టించిన మట్టి గణపయ్యను కాలనీవాసులు అక్కడే నిమజ్జనం చేశారు. రెండు రోజులుగా భారీ వర్షాలు కురవడంతో భారీ విగ్రహాన్ని తరలించలేకపోయారు. దీంతో ప్రతిష్టించిన చోటనే నిమజ్జనం చేశారు.