కరీంనగర్‌లో తస్కరించిన ఆంజనేయ స్వామి విగ్రహాన్ని పునఃప్రతిష్ఠించిన మాజీ మంత్రి గంగుల కమలాకర్

కరీంనగర్‌లో ఆంజనేయ స్వామి విగ్రహం చోరీ వ్యవహారంలో మాజీ మంత్రి గంగుల కమలాకర్ స్పందించారు. ఈ నెలలో దొంగిలించిన విగ్రహాన్ని గుర్తు తెలియని వ్యక్తులు దుబ్బపల్లి వద్ద వదిలేయగా, స్థానికులు దానిని తెచ్చి పునఃప్రతిష్టించారు. గంగుల కమలాకర్ స్వయంగా ఈ కార్యక్రమంలో పాల్గొన్నారు.

కరీంనగర్ 5వ డివిజన్ లోని రాజరాజేశ్వరి కాలనీలో స్థానికులు ఏర్పాటు చేసిన తాత్కాలిక ఆంజనేయ స్వామి గుడి నుంచి, ఇటీవల విగ్రహాన్ని అపహరించి దుబ్బపల్లిలో వదిలేశారు. గంగుల కమలాకర్ తెలిపిన వివరాల ప్రకారం, బొమ్మకల్ గ్రామ పంచాయతీ పరిధిలో 125వ సర్వే నెంబర్ స్థలంలో 10% భూమిని కమ్యూనిటీ అవసరాలకు కేటాయించారు. ఆ స్థలాన్ని కబ్జాదారులు స్వాధీనం చేసుకోవడానికి ప్రయత్నించడంతో, విగ్రహాన్ని తొలగించి ఫెన్సింగ్ వేశారని ఆరోపించారు.

ఈ ఘటన తర్వాత మాజీ మంత్రి స్థానికులతో కలిసి విగ్రహాన్ని మళ్లీ ప్రతిష్టించారు. భవిష్యత్తులో ఇలాంటి సంఘటనలు పునరావృతమైతే కరీంనగర్ బంద్ పిలుపునిచ్చి, హిందువులందరినీ తీసుకొచ్చి శాశ్వత ఆలయం నిర్మిస్తామని గంగుల హెచ్చరించారు.