ఔటర్ రింగ్ రోడ్డుపై 34.5 కిలోల గంజాయి స్వాధీనం, ఇద్దరు అరెస్ట్

సంగారెడ్డి జిల్లా ఔటర్ రింగ్ రోడ్డు సుల్తాన్‌పూర్ ఎగ్జిట్ వద్ద పోలీసులు 34.5 కిలోల గంజాయి స్వాధీనం చేసుకున్నారు. కుద్బపుల్లాపూర్ SOT, అమీన్‌పూర్ పోలీసులు సంయుక్తంగా వాహన తనిఖీలు నిర్వహిస్తుండగా ఈ ఘటన జరిగింది.

పోలీసులు తెలిపిన వివరాల ప్రకారం, ఒడిశా నుంచి మహారాష్ట్రలోని సోలాపూర్‌కు గంజాయి తరలిస్తున్నారనే సమాచారంతో వారు వాహన తనిఖీలు చేపట్టారు. ఈ క్రమంలో ఓ బొలెరో పికప్ వాహనం వస్తుండగా, పోలీసులను చూసి ఇద్దరు వ్యక్తులు పారిపోయేందుకు ప్రయత్నించారు. వారిని పట్టుకుని వాహనం తనిఖీ చేయగా, చేపల బాక్సుల మధ్య దాచిన 34.5 కిలోల ఎండు గంజాయి లభ్యమైంది.

పోలీసులు ఒడిశాకు చెందిన సుమిత్ బిపారి, బాబుల్ మండల్ అనే ఇద్దరిని అరెస్ట్ చేశారు. ఈ కేసులో ప్రధాన సూత్రధారి సుగ్దేవ్ పరారీలో ఉన్నాడు. గంజాయితో పాటు బొలెరో వాహనం, రెండు సెల్‌ఫోన్లు స్వాధీనం చేసుకున్నారు. పోలీసులు కేసు నమోదు చేసి దర్యాప్తు చేస్తున్నారు.