పాత దేవుళ్ల ఫోటోలకు 'ఉద్వాసన' పూజ: GHMC ప్రత్యేక కార్యక్రమం

జీహెచ్ఎంసీ 'ప్రాజెక్ట్ ఉద్వాసన' పేరుతో పాత దేవుడి ఫోటోలు, విగ్రహాలను గౌరవపూర్వకంగా తొలగించే కార్యక్రమాన్ని ప్రారంభించింది.

హైదరాబాద్‌లోని ఆరు దేవాలయాల్లో ఈ సేకరణ కేంద్రాలు ఏర్పాటు చేశారు. ఇంట్లో పూజలు చేసిన పాత ఫోటోలు, ఫ్రేమ్‌లు, విగ్రహాలను భక్తులు ఈ కేంద్రాలకు తీసుకురావచ్చు.

సేకరించిన వాటికి ప్రత్యేకంగా 'ఉద్వాసన పూజ' నిర్వహించి, ఆ తర్వాత గాజు, ఫ్రేమ్‌లను వేరు చేస్తారు. వీటిని రీసైక్లింగ్ కోసం సంబంధిత రీసైక్లర్లకు పంపిస్తారు.

రోడ్ల పక్కన, హుస్సేన్‌సాగర్‌లో, చెత్త కుప్పల్లో దేవుళ్ల ఫోటోలు పడేయడం తగ్గించడమే ఈ కార్యక్రమ లక్ష్యమని జీహెచ్ఎంసీ తెలిపింది. ప్రజలు తమ సమీప దేవాలయాల్లో ఈ కార్యం ఎప్పుడు జరుగుతుందో తెలుసుకుని ఉపయోగించుకోవచ్చు.