పాత దేవుడి పటాల రీసైక్లింగ్‌కు హైదరాబాద్ GHMC ప్రత్యేక కార్యక్రమం – ‘ప్రాజెక్ట్ ఉద్వాసన’

హైదరాబాద్‌లోని ఇళ్లలో ఉన్న పాత దేవుడి పటాలు, విగ్రహాలను భక్తిపూర్వకంగా సేకరించి రీసైక్లింగ్ చేసే కార్యక్రమాన్ని GHMC ప్రారంభించింది. ‘ప్రాజెక్ట్ ఉద్వాసన’ పేరుతో ఈ కార్యక్రమం నిర్వహిస్తున్నారు. పాత పటాలను చెత్తబుట్టల్లో వేయడం, రోడ్లపై పడేయడం వంటి అగౌరవాన్ని నివారించడంతో పాటు పర్యావరణ పరిరక్షణ కోసం దీనిని తీసుకొచ్చామని GHMC అధికారులు తెలిపారు.

సేకరించిన పటాలు, విగ్రహాలను నేరుగా రీసైక్లింగ్‌కు పంపకుండా, ముందుగా శాస్త్రోక్తంగా ఉద్వాసన పూజ నిర్వహిస్తారు. దైవత్వానికి వీడ్కోలు పలికే ఈ ప్రత్యేక పూజ తర్వాతే వాటిని రీసైక్లింగ్ చేస్తారు. ఈ విధానం భక్తుల మనోభావాలను గౌరవిస్తుందని అధికారులు వెల్లడించారు.

ఈ కార్యక్రమంలో భాగంగా నగరంలోని పలు ఆలయాల్లో డ్రాప్-ఆఫ్ కేంద్రాలు ఏర్పాటు చేశారు. బంజారాహిల్స్ లోని ఇస్కాన్ ఆలయం, అమీర్‌పేట్ హనుమాన్ ఆలయం, సైదాబాద్ భూలక్ష్మి ఆలయం, తార్నాక శివాంజనేయ స్వామి ఆలయం, రాజేంద్రనగర్ వెంకటేశ్వర స్వామి ఆలయం, షంషాబాద్ శ్రీ ధర్మస్థల మందిరం, ఖైరతాబాద్ మహంకాళీ పోచమ్మ దేవాలయం, గుడిమల్కాపూర్ విశ్వాంజనేయ భక్త సమాజం ఆలయాల్లో పాత పటాలను అప్పగించవచ్చు. వివరాల కోసం సంబంధిత ఆలయాలను సంప్రదించాలని GHMC కోరింది.