జీహెచ్ఎంసీ ప్రాజెక్ట్ ఉద్వాసన: పాత దేవుడి పటాలను గౌరవంగా రీసైక్లింగ్‌కు

గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) స్వచ్ఛ భారత్‌లో భాగంగా ప్రాజెక్ట్ ఉద్వాసన అనే ప్రత్యేక కార్యక్రమం ప్రారంభించింది. ఇంట్లో ఉపయోగించని దేవుడి ఫోటోలు, విగ్రహాలు, క్యాలెండర్లు, పూజా సామగ్రిని శాస్త్రోక్తంగా వీడ్కోలు పలికి, పర్యావరణానికి హాని కలగకుండా రీసైక్లింగ్ చేయడం ఈ ప్రాజెక్టు లక్ష్యం.

నగరంలో ప్రతి శనివారం ఒక్కో ఆలయంలో ఈ కార్యక్రమం నిర్వహిస్తున్నారు. భక్తులు తమ వాడని దేవతల చిత్రాలు, పగిలిన ఫోటో ఫ్రేమ్‌లు, ఇతర వస్తువులను అక్కడ అందజేస్తారు. జీహెచ్ఎంసీ అధికారులు వాటిని సేకరించి, ముందుగా ఉద్వాసన పూజ (చివరి పూజ) చేస్తారు. తర్వాత గాజు, ఫ్రేమ్‌లను విడదీసి రీసైక్లర్లకు పంపిస్తారు. దీంతో దేవుడి ప్రతిమలు చెత్తకుప్పల్లో, నదులు, చెరువుల్లో కలిసి అపవిత్రం కాకుండా రక్షించబడుతున్నాయి.

జీహెచ్ఎంసీ అధికారి చైతన్య మాట్లాడుతూ, ఇలాంటి వస్తువులను గౌరవంగా వేస్ట్ నుంచి తప్పించి, రీసైక్లింగ్ చేయడం వల్ల ల్యాండ్ ఫిల్లింగ్ తగ్గుతుందన్నారు. ఈ కార్యక్రమాన్ని ఇప్పటికే యూసఫ్‌గూడ, జూబ్లీహిల్స్ ప్రాంతాల్లో నిర్వహించగా, ఇటీవల ఖైరతాబాద్ మహంకాళి పోచమ్మ ఆలయంలో కూడా చేపట్టారు. ప్రజల నుంచి మంచి స్పందన వస్తోందని, భవిష్యత్తులో యాప్‌ ద్వారా రిజిస్ట్రేషన్ చేసుకుని ఎవరైనా విరాళంగా ఇవ్వవచ్చని ఆయన తెలిపారు. ఆలయ నిర్వాహకులు, అర్చకులు, వాలంటీర్లు ఈ కార్యక్రమానికి సహకరిస్తున్నారు.

ప్రస్తుతం పైలట్ మోడ్‌లో సాగుతున్న ఈ ప్రాజెక్ట్‌ను త్వరలో అధికారికంగా ప్రారంభించి, పెద్ద ఎత్తున నిర్వహించనున్నట్లు అధికారులు తెలిపారు. వాడని దైవచిత్రాలు, పూజా వస్తువులను రోడ్లపై, నీటి వనరుల్లో పడేయవద్దని భక్తులకు సూచిస్తున్నారు.