గ్రేటర్ హైదరాబాద్‌లో SIR సర్వే: డబుల్ ఓట్ల రిజిస్ట్రేషన్లు సాఫ్ట్‌వేర్ గుర్తింపు

గ్రేటర్ హైదరాబాద్ మున్సిపల్ కార్పొరేషన్ (GHMC) పరిధిలో కొనసాగుతున్న ప్రత్యేక ఇంటెన్సివ్ రివిజన్ (SIR) సర్వేలో ఒకే వ్యక్తికి రెండు వేర్వేరు ప్రాంతాల్లో ఓటు రిజిస్ట్రేషన్ ఉన్నట్లు గుర్తించారు. ఇప్పటికే ఇతర రాష్ట్రాల్లో SIR ప్రక్రియ పూర్తయిన లేదా మ్యాపింగ్ జరుగుతున్న ఓటర్లు హైదరాబాద్‌లో కూడా తమ పేర్లు నమోదు చేసుకోవడానికి దరఖాస్తులు సమర్పిస్తున్నారు. అయితే ఆన్‌లైన్ నమోదు చేసే సమయంలో ఎన్నికల సంఘం సాఫ్ట్‌వేర్ ఆ వ్యక్తుల వివరాలు మరోచోట ఉన్నట్లు గుర్తించి ఫారాలను తిరస్కరిస్తోంది.

క్షేత్రస్థాయి సిబ్బంది ఇప్పటికే అటువంటి ఫారాలను సంబంధిత వ్యక్తులకు తిరిగి ఇచ్చి, వారి ఓటు వేరే చోట నమోదైందని వివరిస్తున్నారు. ఉత్తరప్రదేశ్, బీహార్, పశ్చిమ బెంగాల్, తమిళనాడు, గుజరాత్, రాజస్థాన్, ఛత్తీస్‌గఢ్, ఆంధ్రప్రదేశ్ సహా పలు రాష్ట్రాల నుంచి వలస వచ్చిన వారిలో ఇటువంటి సందర్భాలు ఎక్కువగా కనిపిస్తున్నాయి. రంగారెడ్డి, మేడ్చల్ మల్కాజిగిరి జిల్లాల పట్టణ నియోజకవర్గాల్లో ఈ పరిస్థితి ఎక్కువగా ఉందని అధికారులు తెలిపారు.

మరోవైపు, కొంతమంది తమ స్వస్థలంలోనే ఓటు కొనసాగించాలని నిర్ణయించుకుని హైదరాబాద్‌లో ఫారాలను స్వీకరించడం లేదు. ఖాళీ ఫారాలను తిరిగి ఇస్తూ, తాము ఇప్పటికే అక్కడ దరఖాస్తు చేశామని చెబుతున్నారు. కొన్ని పోలింగ్ కేంద్రాల్లో ఎన్యూమరేషన్ ఫారాలు 50% వరకు తిరిగిరాగా, మరికొన్ని ప్రాంతాల్లో 35% కూడా చేరలేదు.

దేశంలో ఒక వ్యక్తికి ఒకే చోట ఓటు హక్కు ఉండాలనే ఎన్నికల నిబంధనల ప్రకారం, రెండు ప్రాంతాల్లో నమోదు చట్ట విరుద్ధం. ఉద్యోగ, ఉపాధి, విద్యా కారణాలతో హైదరాబాద్‌కు వలస వచ్చిన చాలామంది తమ స్వగ్రామంతో పాటు నగరంలోనూ ఓటు నమోదు చేసుకున్నారని అధికారులు గుర్తించారు. రాష్ట్రవ్యాప్తంగా SIR ఒకేసారి నిర్వహించడంతో, సాఫ్ట్‌వేర్ ఒకే వ్యక్తి వివరాలు రెండు చోట్ల ఉంటే గుర్తించి, ఎన్నికల సంఘం ప్రతి ఓటర్‌కు ఒకే ఓటు అనే నిబంధనను అమలు చేస్తోంది.