విశాఖ ఆక్సిజన్ టవర్స్ లో గిగ్ వర్కర్ పై దాడి; నిందితుడిని పోలీసులు అదుపులోకి తీసుకున్నారు

విశాఖపట్టణం సీతమ్మధరలోని ఆక్సిజన్ టవర్స్ లో గిగ్ వర్కర్ పై దాడి జరిగింది. డెలివరీ కోసం వచ్చిన షాహిద్ అహ్మద్ ఖాన్ అనే వ్యక్తి లిఫ్ట్ విషయంలో ఫ్లాట్ యజమాని భరత్ తో వాగ్వాదానికి దిగాడు. ఈ క్రమంలో భరత్ దాడి చేయడంతో షాహిద్ కు మెడ, చెవి భాగంలో గాయాలయ్యాయి.

దీంతో బాధితుడు ఎంవిపి పోలీసులకు ఫిర్యాదు చేశాడు. పోలీసులు నిందితుడు భరత్ ను అదుపులోకి తీసుకుని దర్యాప్తు ప్రారంభించారు. చర్యలు తీసుకుంటామని పోలీసులు తెలిపారు.

ఈ ఘటనపై విశాఖ గిగ్ వర్కర్లు ఆక్సిజన్ టవర్స్ ముందు నిరసన వ్యక్తం చేశారు. గిగ్ వర్కర్లపై దాడులను సహించేది లేదని, నిందితుడిని కఠినంగా శిక్షించాలని డిమాండ్ చేశారు. గతంలోనూ ఇదే టవర్స్ లో ఇలాంటి దాడి జరిగిందని, ఇతర అపార్ట్‌మెంట్లలో ఇబ్బందులు లేవని వారు చెప్పారు.

గత ఏడాది మార్చిలో కూడా ఓ గిగ్ వర్కర్ పై దాడి జరగగా, అప్పట్లో డెలివరీలు బంద్ చేశారు. ఆ సమయంలో అసోసియేషన్ ప్రతినిధులు, పోలీసుల చర్చలతో సమస్య పరిష్కారమైంది. అయితే మళ్ళీ ఇప్పుడు దాడి జరగడంతో గిగ్ వర్కర్లు ఆగ్రహం వ్యక్తం చేస్తున్నారు. కస్టమర్లు కిందికి వచ్చి డెలివరీ తీసుకోవాలని, లేదంటే వెంటనే లిఫ్ట్ సదుపాయం కల్పించాలని వారు కోరుతున్నారు.

ఆక్సిజన్ టవర్స్ లో మాత్రమే ఇలాంటి సమస్యలు వస్తున్నాయని, ఇంతకుముందు మరికొన్ని ఘటనలు వెలుగు చూడలేదని గిగ్ వర్కర్లు చెబుతున్నారు. భవిష్యత్తులో దాడులను సహించబోమని, త్వరలో కార్యాచరణ ప్రకటిస్తామని హెచ్చరించారు.