చాక్లెట్ కొనేందుకు వెళ్లిన 9 ఏళ్ల బాలికపై 60 ఏళ్ల దుకాణదారుడి లైంగిక దాడి యత్నం

భద్రాద్రి కొత్తగూడెం జిల్లా అశ్వారావుపేటలో చాక్లెట్ కొనేందుకు వెళ్లిన 9 ఏళ్ల బాలికపై 60 ఏళ్ల దుకాణదారుడు లైంగిక దాడికి యత్నించిన ఘటన వెలుగులోకి వచ్చింది.

ఆంధ్రప్రదేశ్ నుంచి వేసవి సెలవుల్లో బంధువుల ఇంటికి వచ్చిన ఈ బాలిక, తన 3 ఏళ్ల చెల్లెలితో కలిసి దుకాణానికి వెళ్లింది. దుకాణదారుడు బాలికకు కూల్ డ్రింక్ ఇస్తానని చెప్పి లోపలికి తీసుకెళ్లి, ఒక గదిలోకి తీసుకెళ్లినట్లు బాధిత కుటుంబం తెలిపింది.

చెల్లెలు ఇంటికి వెళ్లి విషయం చెప్పడంతో, కుటుంబ సభ్యులు వెంటనే దుకాణం వద్దకు చేరుకుని ఆ వ్యక్తిపై దాడి చేశారు. దాడి భయంతో అతను పోలీస్ స్టేషన్ కు పారిపోయాడు.

పోలీసులు స్పందిస్తూ, ఇప్పటివరకు బాధిత కుటుంబం నుంచి లిఖితపూర్వక ఫిర్యాదు రాలేదని, అందువల్ల కేసు నమోదు చేయలేదని తెలిపారు. అయితే, స్థానిక నాయకుల ఒత్తిడి కారణంగా పోలీసులు కేసు నమోదు చేయడంలేదని బాధిత కుటుంబం ఆరోపించింది.