భద్రాచలంలో గోదావరి పుష్కరాల పనులు ఆలస్యం – స్థానికుల ఆందోళన

వచ్చే ఏడాది జూన్ 26 నుంచి జూలై 7 వరకు గోదావరి పుష్కరాలు జరగనున్నాయి. ఈ సందర్భంగా కోటి మంది భక్తులు భద్రాచలం వస్తారని రాష్ట్ర ప్రభుత్వం అంచనా వేసింది. భక్తుల రద్దీకి అనుగుణంగా మౌలిక సదుపాయాలు కల్పించాలని నిర్ణయించింది.

పుష్కర స్నాన ఘట్టాల అభివృద్ధితో పాటు రహదారులు, పార్కింగ్, మంచినీరు, పారిశుద్ధ్యం, డ్రైనేజీ వ్యవస్థ వంటి వసతుల కోసం ప్రభుత్వం ఆదేశాలు జారీచేసింది. అయితే ఇప్పటివరకు పనులు ఆరంభ దశలోనే ఉన్నాయి. టెండర్ల ప్రక్రియ కూడా పూర్తి కాలేదు. చేతికి ఇంకా 11 నెలల సమయం మాత్రమే ఉంది. వర్షాకాలంలో పనులు సాగే అవకాశం తక్కువగా ఉండటంతో ఆచరణలో సమయం మరింత తగ్గుతోంది.

భద్రాచలం దేవస్థానం సుమారు 50 కోట్ల రూపాయల అభివృద్ధి ప్రతిపాదనను ప్రభుత్వానికి పంపింది. ప్రస్తుతం ప్రభుత్వం కేటాయించింది కోటిన్నర రూపాయలు మాత్రమే. భక్తుల సంఖ్యను దృష్టిలో ఉంచుకుంటే ఈ నిధులు సరిపోవని స్థానికులు అభిప్రాయపడుతున్నారు.

భద్రాద్రి జిల్లాకు చెందిన ముగ్గురు మంత్రులు ప్రభుత్వంలో కీలక బాధ్యతలు నిర్వహిస్తున్నారు. అయినా భద్రాచలం పుష్కరాల పనులకు తగిన ప్రాధాన్యత లభించడం లేదనే చర్చ వినిపిస్తోంది. వెంటనే నిధులు కేటాయించి టెండర్ల ప్రక్రియ మొదలుపెట్టి నాణ్యతతో పనులు పూర్తిచేయాలని స్థానికులు కోరుతున్నారు.