గోదావరి పుష్కరాలకు 543 ఆలయాల అభివృద్ధి పనులు, 162కి టెండర్లు

గోదావరి పుష్కరాల నాటికి భక్తులకు మెరుగైన సౌకర్యాలు కల్పించేందుకు 543 ఆలయాల్లో అభివృద్ధి పనులు చేపడుతున్నట్లు దేవాదాయ శాఖ కమిషనర్ కె. రామచంద్రమోహన్ తెలిపారు.

రాజమహేంద్రవరం కలెక్టరేట్‌లో కలెక్టర్ కీర్తి చేకూరి, పుష్కర స్పెషల్ ఆఫీసర్ రాహుల్ మీనాతో కలిసి సమీక్ష నిర్వహించారు. తూర్పు గోదావరి, కోనసీమ జిల్లాల్లోని పుష్కర ఘాట్లు, ప్రముఖ ఆలయాలను కమిషనర్ స్వయంగా పరిశీలించారు. కోనసీమలోని వాడపల్లి వెంకటేశ్వర స్వామి, మందపల్లి శనేశ్వర స్వామి ఆలయాల్లో సిబ్బందికి సూచనలు ఇచ్చారు.

ఇప్పటివరకు 29 ప్రముఖ ఆలయాలను, మొత్తం 543 ఆలయాలను శాశ్వత పనుల కోసం గుర్తించారు. వీటిలో 162 పనులకు పరిపాలన అనుమతి ఇచ్చి టెండర్లు పిలిచారు. మిగతా అన్ని పనులను ఏప్రిల్ నుంచి జూన్ మధ్య పూర్తి చేయాలని లక్ష్యంగా పెట్టుకున్నారు.

పుష్కరాల సమయంలో భక్తుల రద్దీ పెరుగుతుంది కాబట్టి తాత్కాలిక ఏర్పాట్లు కూడా చేస్తామని కమిషనర్ చెప్పారు. ప్రధాన క్యూలైన్, తాత్కాలిక షెల్టర్లు, మరుగుదొడ్లు, మంచినీటి సదుపాయం వంటి నాలుగు ముఖ్యమైన అంశాలను ప్రాధాన్యంగా తీసుకుంటున్నట్లు వివరించారు.