‘గాడ్జిల్లా’ ఎల్నినోతో తెలంగాణలో 33% వర్షాభావం – శాస్త్రవేత్తల హెచ్చరిక

తెలంగాణలో ఈ ఏడాది వర్షపాతం 33 శాతం లోటుతో నమోదవుతోంది. అన్ని జిల్లాల్లోనూ సగటు వర్షపాతం కంటే తక్కువ వర్షాలు పడ్డాయి. హనుమకొండ జిల్లాలో అత్యధికంగా 66 శాతం లోటు ఉంది.

1870 తర్వాత అత్యంత తీవ్రమైన సూపర్ ఎల్నినో రాబోతోందని బ్రిటన్ శాస్త్రవేత్తలు హెచ్చరిస్తున్నారు. ఈ సూపర్ ఎల్నినోను ‘గాడ్జిల్లా’గా పిలుస్తున్నారు. అమెరికాకు చెందిన NOAA సంస్థ ఆగస్టు చివరి వారం లేదా సెప్టెంబర్ మొదటి వారం నాటికి సూపర్ ఎల్నినోగా మారే అవకాశం 83 శాతం ఉందని తెలిపింది. 2027లోనూ ఇది కొనసాగే అవకాశం 97 శాతంగా ఉందని హెచ్చరించింది.

ప్రపంచ వాతావరణ సంస్థ నైరుతి పసిఫిక్ మహాసముద్రంలో జలాలు తీవ్రంగా వేడెక్కాయని, ఆమ్లీకరణ చెందుతున్నాయని వెల్లడించింది. 2015 ఎల్నినో కంటే ఇప్పుడు ఉష్ణోగ్రతలు 0.85°C ఎక్కువగా నమోదయ్యే అవకాశం ఉందని శాస్త్రవేత్తలు చెబుతున్నారు.

తెలంగాణలో వర్షాకాలం ప్రారంభమై 45 రోజులు దాటినా గణనీయమైన వర్షాలు లేవు. సగటు వర్షపాతం 236.6 మిమీ కావాల్సి ఉండగా, ఇప్పటివరకు 158.7 మిమీ మాత్రమే నమోదైంది. వచ్చే వారం రోజుల పాటు వర్షాలు పడే అవకాశం లేదని వాతావరణ శాఖ తెలిపింది. గాలులు తీవ్రంగా ఉండి, ఉష్ణోగ్రతలు పెరిగే అవకాశం ఉందని హెచ్చరించింది.

ఈ ఎల్నినో ప్రపంచ ఆర్థిక వ్యవస్థలను చిన్నాభిన్నం చేస్తుందని, కోట్లాది మందిని ఆహార సంక్షోభంలోకి నెట్టేస్తుందని బ్రిటన్ వాతావరణ సంస్థ హెచ్చరించింది. ఇప్పటికే రాష్ట్రంలో వర్షాభావంతో మొలకలు ఎండిపోతున్నాయి. నేలలో తడి లేక విత్తులు మొలకెత్తడం లేదు.