అహ్మదాబాద్ విమానంలో టాయిలెట్ నుంచి 24 బంగారు బిస్కెట్లు స్వాధీనం

అహ్మదాబాద్ అంతర్జాతీయ విమానాశ్రయంలో కస్టమ్స్ అధికారులు భారీ మొత్తంలో బంగారం స్వాధీనం చేసుకున్నారు.

దుబాయ్ నుంచి వచ్చిన విమానంలో తనిఖీలు నిర్వహించిన సమయంలో టాయిలెట్‌లో అనుమానాస్పద పౌచులు కనిపించాయి. వాటిని తెరచి చూడగా 24 బంగారు బిస్కెట్లు లభ్యమయ్యాయి. మొత్తం 2799 గ్రాముల బంగారం విలువ రూ.4.26 కోట్లకు పైగా ఉంటుందని అధికారులు అంచనా వేశారు.

స్మగ్లర్లు ఈసారి విమానంలోని టాయిలెట్ స్పీకర్ల మధ్య బంగారం దాచారు. సాధారణంగా ప్రయాణికుల సీట్ల కింద, లగేజ్‌లో దాచే పద్ధతులకు భిన్నంగా ఈ కొత్త విధానం కనిపించింది.

ఈ బంగారం తమదేనని ఎవరూ క్లెయిమ్ చేయలేదు. నిందితులను గుర్తించేందుకు విమానం కాక్‌పిట్ సమీపంలోని సీసీటీవీ ఫుటేజీని పరిశీలిస్తున్నారు. టాయిలెట్ ఉపయోగించిన ప్రయాణికుల జాబితాను కూడా సేకరిస్తున్నారు. దర్యాప్తు కొనసాగుతోంది.