తెలంగాణ యువకుడి రాక్ బాల్ స్వర్ణం: గోపాల్ యాదవ్ ప్రస్థానం

మేడ్చల్ జిల్లా పూడూరు గ్రామానికి చెందిన గోపాల్ యాదవ్ అనే యువ రాక్ బాల్ క్రీడాకారుడు మొదటి సౌత్ ఏషియన్ గేమ్స్‌లో భారతదేశం తరపున స్వర్ణ పతాకం సాధించాడు. 8 దేశాలు పాల్గొన్న ఈ పోటీలలో అతని ప్రదర్శన అభినందనీయం.

గోపాల్ యాదవ్ సాధారణ కుటుంబం నుంచి వచ్చాడు. తండ్రి మేకల కాపరి కాగా, తల్లి వ్యవసాయ కూలిగా పనిచేస్తోంది. ప్రభుత్వ పాఠశాలలో విద్యాభ్యాసం పూర్తి చేసిన అతను, క్రీడల్లో ప్రతిభ ఆధారంగా హైదరాబాద్‌లోని AV మల్లారెడ్డి కళాశాలలో ఉచిత సీటు పొంది MBA, BPEd కోర్సులు పూర్తి చేశాడు.

2011లో వాలీబాల్ ఆటగాడిగా కెరీర్ మొదలైన గోపాల్, ఆటతో పాటు సొంత ఖర్చుల కోసం రాత్రుళ్లు ఫైనాన్స్ కలెక్షన్ పని కూడా చేశాడు. ఐదేళ్ల పాటు ఇలా చదువు, ఆట, పని బ్యాలెన్స్ చేస్తూ అనేక టోర్నీల్లో పాల్గొన్నాడు. టోర్నీలకు వెళ్లేటప్పుడు ఆర్థిక ఇబ్బందులతో జనరల్ బోగీలలో నిలబడి ప్రయాణాలు చేయడం, డిపోలలో నిద్రించడం వంటి కష్టాలను ఎదుర్కొన్నాడు.

వాలీబాల్‌లో రాణిస్తున్న గోపాల్‌కు కోచ్ లక్ష్మణ్ రూపంలో సరైన మార్గదర్శకత్వం లభించింది. ఆయన ప్రోత్సాహంతో వాలీబాల్‌ను పోలి ఉండే రాక్ బాల్ క్రీడ వైపు దృష్టి సారించాడు. లెఫ్ట్ హ్యాండ్ ప్లేయర్ అయిన గోపాల్‌కు రాక్ బాల్ మరింత కలిసి వచ్చింది. ఢిల్లీలో జరిగిన కఠినమైన ట్రయల్స్ తర్వాత 12 మంది భారత జాతీయ జట్టులో ఒకడిగా స్థానం దక్కించుకున్నాడు.

సౌత్ ఏషియన్ గేమ్స్‌లో స్వర్ణ పతాకం సాధించిన తర్వాత గోపాల్ యాదవ్ స్పందిస్తూ, "ప్రభుత్వం స్పోర్ట్స్ కోటాలో ఉద్యోగం ఇస్తే భవిష్యత్తులో దేశానికి మరిన్ని పతాకాలు సాధిస్తానని" తెలిపాడు. కోచ్ లక్ష్మణ్ మాట్లాడుతూ, "ఈ ఆట 18 ఏళ్లుగా ఉంది, కానీ దక్షిణాసియా స్థాయిలో మొదటిసారి నిర్వహించారు. మా విద్యార్థి స్వర్ణం సాధించడం సంతోషంగా ఉంది," అన్నారు. గోపాల్ యాదవ్ సాధించిన విజయం గ్రామానికి, తల్లిదండ్రులకు మంచి పేరు తెచ్చిపెట్టిందని అతని తండ్రి అభిప్రాయపడ్డారు.