దేశాభివృద్ధిలో ఆదాయపు పన్ను కీలకం: గవర్నర్ శివ్ ప్రతాప్ శుక్లా

హైదరాబాద్‌లోని బంజారా హిల్స్‌లో ఆదాయపు పన్ను దినోత్సవం సందర్భంగా ఏర్పాటు చేసిన కార్యక్రమంలో గవర్నర్ శివ్ ప్రతాప్ శుక్లా ప్రసంగించారు. పన్ను చెల్లింపు దేశాభివృద్ధిలో అత్యంత కీలక పాత్ర పోషిస్తుందని ఆయన వివరించారు.

ఈ సందర్భంగా గవర్నర్ మాట్లాడుతూ, ప్రాచీన భారతీయ దర్శనాన్ని ఉటంకిస్తూ, కవి కాళిదాసు రచించిన రఘువంశం నుంచి ఒక శ్లోకాన్ని ప్రస్తావించారు. సూర్యుడు భూమి నుంచి నీటి బిందువులను సేకరించి వెయ్యి రెట్లు వర్షంగా తిరిగి ఇచ్చినట్లే, ప్రభుత్వం ప్రజల నుంచి పన్నుల రూపంలో సేకరించిన నిధులను మౌలిక సదుపాయాలు, భద్రత, సంక్షేమ కార్యక్రమాలుగా మరింత ఎక్కువగా తిరిగి ఇస్తుందని వివరించారు. పన్ను చెల్లింపు అనేది కేవలం చట్టపరమైన బాధ్యత మాత్రమే కాదు, అది దేశ నిర్మాణంలో అతి పెద్ద సహకారం అని అన్నారు.

అదే సమయంలో ఆదాయపు పన్ను విచారణ, అంచనాలు, అప్పీల్ ఉత్తర్వుల నాణ్యతను మెరుగుపరచాల్సిన అవసరం ఉందని గవర్నర్ సూచించారు. వాస్తవాలను సరిగా సమన్వయం చేయకపోవడం, కేసు ప్రజంటేషన్ సరిగా లేకపోవడం వల్ల చాలా కేసులు ఓడిపోతున్నాయని ఆయన హెచ్చరించారు.

భారతదేశం అత్యంత పెద్ద యువ శ్రామిక శక్తి ఉన్న అభివృద్ధి చెందుతున్న ఆర్థిక వ్యవస్థ అని, సమర్థ పన్ను పరిపాలన ద్వారా 'వికసిత్ భారత్' లక్ష్యాన్ని వేగంగా సాధించవచ్చని గవర్నర్ అన్నారు. కార్యక్రమంలో పలువురు ఐటీ అధికారులను ఉత్తమ సేవలకు సత్కరించారు.