హైదరాబాద్‌లో కిలోమీటర్‌కు ₹9-10కే గ్రీన్ SM ఎలక్ట్రిక్ AC క్యాబ్ సర్వీస్

వియత్నాం కంపెనీ గ్రీన్ SM హైదరాబాద్‌లో ఎలక్ట్రిక్ AC క్యాబ్ సర్వీసును ప్రారంభించింది. ఈ సర్వీసులో కిలోమీటర్‌కు ₹9 నుంచి ₹10 మాత్రమే ఛార్జీ ఉంటుంది. surge pricing లేకుండా రైడ్లు అందిస్తున్నట్లు కంపెనీ తెలిపింది.

హైదరాబాద్‌లో ఇప్పటికే Ola, Uber, Rapido వంటి టాక్సీ సర్వీసులు నడుస్తున్నాయి. ఈ మార్కెట్‌లోకి గ్రీన్ SM తక్కువ ఛార్జీలతో ప్రవేశించింది. కంపెనీ నడిపే కార్లన్నీ ఎలక్ట్రిక్ AC కార్లే. ఎలక్ట్రిక్ కార్లు కావడం వల్ల పర్యావరణ కాలుష్యం తగ్గుతుందని కంపెనీ చెప్తోంది.

ఇతర క్యాబ్ సర్వీసుల్లో వాహనం, డ్రైవర్ రెండూ ఓనరే ఏర్పాటు చేసుకోవాలి. గ్రీన్ SM లో మాత్రం కారును కంపెనీ ఇస్తుంది. డ్రైవింగ్ వచ్చిన వారికి నెల ఫిక్స్డ్ జీతంతో ఉద్యోగం ఇస్తున్నట్లు కంపెనీ చెప్తోంది. దీంతో అద్దెకు కారు తీసుకుని క్యాబ్ నడిపే డ్రైవర్లు ఈ జీతం ఉద్యోగాల వైపు ఆకర్షితులయ్యే అవకాశం ఉంది. తక్కువ ఛార్జీల వల్ల ప్రయాణికులు కూడా ఈ సర్వీసులకే ఎక్కువ మొగ్గు చూపుతున్నారు.

ఈ ప్రవేశంపై ఆటో డ్రైవర్లు, క్యాబ్ డ్రైవర్లు, ప్రైవేట్ ట్రావెల్స్ యజమానులు అభ్యంతరం వ్యక్తం చేస్తున్నారు. తెలంగాణలో సుమారు 50 వేల మంది డ్రైవర్లు ఉన్నారని యూనియన్ నాయకులు చెబుతున్నారు. ఇతర రాష్ట్రాల నుంచి వచ్చి ఇక్కడ పని చేస్తున్న మరో 15 వేల మంది డ్రైవర్లు ఉన్నారని అంచనా. గ్రీన్ SM వల్ల వీరి ఉపాధిపై తీవ్ర ప్రభావం పడుతుందని వారు ఆందోళన వ్యక్తం చేస్తున్నారు.

ఢిల్లీ, తమిళనాడు, ముంబై, బెంగళూరు, హైదరాబాద్‌లలో కంపెనీ సర్వీసులు నడుస్తున్నాయని యూనియన్ నాయకులు చెప్తున్నారు. రాష్ట్ర ప్రభుత్వంతో ఒప్పందం చేసుకుని తక్కువ ధరలకు క్యాబ్లు నడుపుతున్నారని వారు ఆరోపిస్తున్నారు. ఈ సర్వీసులను ఆపాలని ప్రభుత్వాన్ని వారు హెచ్చరించారు. ఉపాధి దెబ్బతింటే డ్రైవర్లు ఆత్మహత్యలకు పాల్పడే పరిస్థితి వస్తుందని కూడా వారు చెప్పారు. ఈ విషయంపై తెలంగాణ ప్రభుత్వం స్పందన తెలియాల్సి ఉంది.