వేరుశనగ పంటకు తెగుళ్ల బెడద ఎక్కువ: ఎలమంచిలి శాస్త్రవేత్త సూచనలు

ఆంధ్రప్రదేశ్, తెలంగాణలోని రాయలసీమ, ఉత్తరాంధ్ర, ఉత్తర-దక్షిణ తెలంగాణ జిల్లాల్లో వేరుశనగ పంట విస్తారంగా సాగవుతోంది. ప్రస్తుతం పంట 10 నుండి 40 రోజుల దశలో ఉండగా, వాతావరణ పరిస్థితుల కారణంగా తెగుళ్ల బెడద పెరిగినట్టు శాస్త్రవేత్తలు గుర్తించారు.

విశాఖపట్నం జిల్లా ఎలమంచిలి వ్యవసాయ పరిశోధన స్థానం శాస్త్రవేత్త హసీనా భాను రైతులకు సమగ్ర రక్షణ చర్యలు సూచించారు. ఆకుమచ్చ తెగులు (త్వరగా, ఆలస్యంగా వచ్చే రకాలు), తుప్పు/కుంకుమ తెగులు, మొదలుకుళ్ళు, కాండం కుళ్ళు (బూజు/బూడిమ) తెగుళ్ల లక్షణాలు, నివారణ చర్యలు వివరించారు.

ఆకుమచ్చ నివారణకు కదిరి, హరితాంధ్ర, అభయ, కదిరి అమరావతి వంటి తట్టుకునే రకాలు సాగు చేయాలని, తెగులు కనిపించిన వెంటనే 400 గ్రాముల మ్యాంకోజెబ్ లేదా 200 గ్రాముల కార్బండిజం 200 లీటర్ల నీటిలో కలిపి పిచికారీ చేయాలన్నారు. తుప్పు తెగులుకు 400 గ్రాముల క్లోరోథలోనిల్, లేదా 200 మి.లీ ట్రైడిమార్ఫ్, లేదా 400 గ్రాముల మ్యాంకోజెబ్ వాడాలని చెప్పారు.

మొదలుకుళ్ళు తెగులు నివారించడానికి విత్తనాన్ని కిలోకు 1 గ్రాము టెబికోనజోల్ లేదా 3 గ్రాముల మ్యాంకోజెబ్‌తో శుద్ధి చేయాలి. విత్తే లోతు 5 సెం.మీ. మించకూడదు. తెగులు సోకితే 400 గ్రాముల మ్యాంకోజెబ్ 200 లీటర్ల నీటిలో కలిపి పిచికారీ చేయాలి. కాండం కుళ్ళు తెగులు నివారణకు కూడా ఇదే మందు వాడాలి. పంట మార్పిడి పాటించడం వల్ల తెగుళ్లను అరికట్టవచ్చని శాస్త్రవేత్త సూచించారు.