గుజరాత్‌లోని బావిలో సముద్ర కెరటాల దృశ్యంపై GSI దర్యాప్తు

గుజరాత్ రాష్ట్రంలోని మోర్బీ జిల్లాలో ఒక రైతు వ్యవసాయ భూమిలో తవ్విన 18 అడుగుల లోతైన బావిలో నీరు సముద్రపు కెరటాల్లా ఎగసిపడుతున్న దృశ్యం ప్రజలను ఆశ్చర్యానికి గురి చేసింది. దీన్ని పరిశీలించేందుకు జియోలాజికల్ సర్వే ఆఫ్ ఇండియా (GSI) బృందం వీర్పడ్ గ్రామానికి చేరుకుంది.

డైరెక్టర్ విజయ్ కుమార్ దాస్ నేతృత్వంలోని నిపుణుల బృందం బావిని క్షుణ్ణంగా పరిశీలించింది. అదనంగా 500 మీటర్ల దూరంలోని మరో బావిని కూడా పరిశీలించారు. ప్రాథమిక అంచనాల ప్రకారం, ఇటీవల కురిసిన వర్షాల వల్ల భూగర్భ జలాలు హఠాత్తుగా పెరగడంతో భూమి పొరల్లోని గాలి బుడగలు పైకి తోసుకు రావడం వల్ల ఈ దృశ్యం ఏర్పడిందని GSI భూగర్భ శాస్త్రవేత్తలు భావిస్తున్నారు.

భూకంపం వస్తుందనే ఆందోళన అవసరం లేదని, భూగర్భంలో ఎలాంటి అలజడి లేదని అధికారులు స్పష్టం చేశారు. GSI బృందం పూర్తి అధ్యయనం తర్వాత సమగ్ర నివేదికను మోర్బీ జిల్లా కలెక్టర్‌కు సమర్పించనుంది.