గుణదల రైల్వే స్టేషన్‌లో రూ.98 కోట్ల ROB పనుల ప్రారంభం; శంకుస్థాపన చేసిన ఎంపీ చిన్ని, ఎమ్మెల్యే బోండా ఉమ

విజయవాడ గుణదల రైల్వే స్టేషన్‌లో రూ.98 కోట్ల ROB (రోడ్ ఓవర్‌బ్రిడ్జి) నిర్మాణ పనులు ప్రారంభమయ్యాయి. ఈ పనులకు ఎంపీ కేశినేని చిన్ని, ఎమ్మెల్యే బోండా ఉమ శంకుస్థాపన చేశారు.

ఈ సందర్భంగా వారు మాట్లాడుతూ, గుణదల స్టేషన్ నుంచి ప్రయాణికులకు అన్ని సౌకర్యాలు కల్పిస్తామన్నారు. ముఖ్యమంత్రి చంద్రబాబు, ఉప ముఖ్యమంత్రి, మంత్రి నారా లోకేశ్ సహకారంతో పనులు సాధ్యమయ్యాయని తెలిపారు.

దేశవ్యాప్తంగా ఉన్న రైల్వే గేట్ల నిర్మాణాన్ని 100 శాతం కేంద్ర నిధులతో చేయాలని ప్రధాని మోదీ, రైల్వే మంత్రి అశ్విని వైష్ణవ్ నిర్ణయించారని ఎంపీ చిన్ని పేర్కొన్నారు. అమృత్ భారత్ స్టేషన్ పథకంలో భాగంగా గుణదల స్టేషన్‌ను గన్నవరం విమానాశ్రయం స్థాయిలో అభివృద్ధి చేస్తున్నారు.

పెండింగ్‌లో ఉన్న రైల్వే ప్రాజెక్టులపై దృష్టి పెట్టామని, డివిజనల్ మేనేజర్, రైల్వే బోర్డు, కేంద్ర మంత్రి వరకు పలుమార్లు విజ్ఞప్తి చేసి ROB ఆమోదం పొందగలిగామని వివరించారు. త్వరలోనే సమీపంలో ఉన్న మరో ROB (లెవల్ క్రాసింగ్ నెం.8) పనులు కూడా ప్రారంభిస్తామని చెప్పారు. మిగిలిన ప్రాజెక్టులు కూడా త్వరలో పూర్తి చేస్తామని హామీ ఇచ్చారు.