గువ్వల చెరువు ఘాట్‌లో టన్నెల్‌ నిర్మాణానికి నిధులు కేటాయింపు, పర్యావరణ అనుమతుల కోసం ఎదురుచూపు

కడప జిల్లాలోని గువ్వల చెరువు ఘాట్ రోడ్డు జాతీయ రహదారి-40 లో భాగంగా ప్రమాదకర మలుపులతో తరచూ రోడ్డు ప్రమాదాలు జరుగుతున్నాయి. ఈ మలుపులను నివారించేందుకు 4–5 కిలోమీటర్ల సొరంగ మార్గం నిర్మించేందుకు కేంద్ర ప్రభుత్వం 2024 లోనే ₹1000 కోట్ల నిధులు కేటాయించింది.

అయితే శేషాచలం అటవీ ప్రాంతంలో ఈ నిర్మాణం రావడంతో పర్యావరణ, అటవీ అనుమతులు రావలసి ఉంది. వన్యప్రాణుల రక్షణ నిబంధనల కారణంగా ఈ అనుమతులు ఆలస్యమవుతున్నట్లు అధికారులు తెలిపారు.

ప్రస్తుతం టెక్నికల్ సర్వేలు, బోరు పరీక్షలు జరుగుతున్నాయని, మరో 2–3 నెలల్లో అవసరమైన క్లియరెన్సులు లభించే అవకాశం ఉందని అధికార వర్గాలు చెబుతున్నాయి. ఇటీవల జరిగిన కేంద్ర-రాష్ట్ర పర్యావరణ సమావేశంలో ఈ ప్రాజెక్టుకు సంబంధించి కొంత పురోగతి కనిపించింది.

రాష్ట్ర రవాణా శాఖ మంత్రి మండిపల్లి రామప్రసాద్ రెడ్డి, ముఖ్యమంత్రి చంద్రబాబు నాయుడు ఈ సొరంగ నిర్మాణంపై ప్రత్యేక దృష్టి పెట్టారు. కేంద్రంలో, రాష్ట్రంలో NDA ప్రభుత్వాలు ఉండడంతో అనుమతుల ప్రక్రియ త్వరగా పూర్తయ్యే అవకాశం ఉందని స్థానిక అధికారులు భావిస్తున్నారు.

ఈ టన్నెల్ నిర్మాణం పూర్తయితే కడప-రాయచోటి-బెంగళూరు మధ్య ప్రయాణం సులభతరం కావడంతో పాటు రోడ్డు ప్రమాదాలు గణనీయంగా తగ్గుతాయని ప్రజలు ఆశాభావం వ్యక్తం చేస్తున్నారు.