తెలంగాణ, ఏపీలో భారీ వర్షాలు; IMD హెచ్చరిక

భారత వాతావరణ శాఖ (IMD) జూలై 29 రాత్రి తాజా బులెటిన్ విడుదల చేసింది. రాబోయే రోజుల్లో ఆంధ్రప్రదేశ్, తెలంగాణలో వర్షాలు కొనసాగుతాయని హెచ్చరించింది. ఉరుములు, పిడుగులు, బలమైన ఈదురుగాలులు వీచే అవకాశం ఉందని తెలిపింది.

తెలంగాణలో భారీ నుంచి అతి భారీ వర్షాలు కురిసే అవకాశం ఉంది. జూలై 29 రాత్రి నుంచి 30వ తేదీ ఉదయం వరకు అదిలాబాద్, కొమరంభీం, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు జిల్లాల్లో భారీ వర్షాలు నమోదవుతాయి. భద్రాద్రి, కొత్తగూడెం, వికారాబాద్, సంగారెడ్డి, మెదక్, కామారెడ్డి జిల్లాలకు కూడా భారీ వర్షాల హెచ్చరిక జారీ చేసింది. రానున్న రెండు మూడు రోజుల పాటు పలు జిల్లాల్లో భారీ వర్షాలు కొనసాగవచ్చు. ఆ తర్వాత ఐదు రోజుల్లో తేలికపాటి నుంచి మోస్తరు వర్షాలు కొనసాగుతాయని ఐఎండి తెలిపింది. గంటకు 30-40 కి.మీ వేగంతో ఈదురుగాలులు వీస్తాయి.

ఆంధ్రప్రదేశ్లో అమరావతి వాతావరణ కేంద్రం అంచనాల ప్రకారం జూలై 29 నుంచి ఆగస్టు 5 వరకు చాలా ప్రాంతాల్లో తేలికపాటి నుంచి మోస్తరు వర్షాలు కురుస్తాయి. ఉత్తర కోస్తాలో తొలి రెండు రోజులు ఉరుములు, పిడుగులతో కూడిన వర్షాలు పడతాయి. కొన్ని ప్రాంతాల్లో భారీ వర్షాలు నమోదయ్యే అవకాశం ఉంది. గంటకు 40-50 కి.మీ వేగంతో ఈదురుగాలు వీస్తాయి. దక్షిణ కోస్తాలోనూ తొలి రెండు రోజులు ఇదే పరిస్థితి ఉంటుంది. రాయలసీమలో మూడు రోజుల పాటు తేలికపాటి వర్షాలు కురుస్తాయి. పిడుగులు పడే అవకాశం ఉన్నందున రైతులు, బయట తిరిగేవారు జాగ్రత్తలు తీసుకోవాలి.

భారీ వర్షాల కారణంగా లోతట్టు ప్రాంతాలు జలమయం కావొచ్చు. రోడ్లపై ట్రాఫిక్ అంతరాయం, విద్యుత్ సరఫరా సమస్యలు తలెత్తే అవకాశం ఉంది. ఉరుములు, పిడుగులు ఉన్నప్పుడు చెట్ల కింద నిలబడకూడదు. బలమైన గోడలు, విద్యుత్ స్తంభాలకు దూరంగా ఉండాలని అధికారులు సూచించారు. భారీ వర్షాల సమయంలో అత్యవసరం తప్ప బయటకు వెళ్లొద్దు.