తెలంగాణలో పలు జిల్లాలకు IMD ఎల్లో అలర్ట్ – ఇవాళ, రేపు వర్షాలు

తెలంగాణలోని పలు జిల్లాల్లో ఇవాళ, రేపు తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ (IMD) ఎల్లో అలర్ట్ జారీ చేసింది.

పెద్దపల్లి, కరీంనగర్, సిద్దిపేట, మెదక్, యాదాద్రి భువనగిరి, మేడ్చల్, హైదరాబాద్, రంగారెడ్డి, వికారాబాద్, నల్గొండ, సూర్యాపేట జిల్లాల్లో అక్కడక్కడ వర్షాలు కురుస్తాయని అధికారులు తెలిపారు. వర్షాలతో పాటు గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉంది.

లోతట్టు ప్రాంతాల్లో నీరు నిలిచే ప్రమాదం ఉన్నందున ప్రజలు అప్రమత్తంగా ఉండాలని వాతావరణ శాఖ సూచించింది. నిన్న కురిసిన వర్షాలతో గోదావరి, కృష్ణా నదులలో వరద ప్రవాహం పెరిగింది. ఆల్మట్టికి 83,948 క్యూసెక్కులు, నారాయణపూర్‌కి 52,370 క్యూసెక్కులు, జూరాలకు 33,900 క్యూసెక్కుల వరద నీరు వస్తోంది. మహారాష్ట్ర, ఛత్తీస్‌గఢ్, కర్ణాటక రాష్ట్రాల్లో కురిసిన వర్షాలే ఈ వరదకు కారణమని అధికారులు వివరించారు.