హైదరాబాద్‌లో భారీ వర్షం: రోడ్లపై నీటి నిల్వ, ట్రాఫిక్ అంతరాయం

హైదరాబాద్ నగరంలో ఈ రోజు జోరు వర్షం కురిసింది. సికింద్రాబాద్, పంజాగుట్ట, అమీర్‌పేట, ఖైరతాబాద్ అసెంబ్లీ పరిసర ప్రాంతాల్లో భారీ వర్షం పడింది. క్యుములోనింబస్ మేఘాల కారణంగా హఠాత్తుగా వాతావరణం మారిపోయింది.

ట్యాంక్ బండ్ వద్ద, మెట్రో పిల్లర్ల కింద, ఫ్లైఓవర్ల కింద ప్రజలు తలదాచుకున్నారు. వర్షం పడే సమయంలో చాలా మంది ఇళ్లకు చేరుకోలేక రోడ్లపై ఆగిపోయారు. ట్రాఫిక్ పోలీసులు రద్దీని క్రమబద్ధీకరిస్తున్నారు.

వాతావరణ కేంద్రం అంచనా ప్రకారం ఈదురు గాలులు గంటకు 30 నుంచి 60 కిలోమీటర్ల వేగంతో వీచే అవకాశం ఉంది. హైదరాబాద్‌తో పాటు రాష్ట్రంలోని పలు జిల్లాల్లో మోస్తరు వర్షాలు కురుస్తాయని తెలిపింది.

హైడ్రా అత్యవసర బృందాలు నీటి నిల్వలు లేకుండా చూస్తున్నాయి. ప్రయాణికులకు ఇబ్బంది కలగకుండా వివిధ శాఖలు సమన్వయం చేసుకుంటున్నాయి.