తెలంగాణలో భారీ వర్షాలు; నర్సాపూర్లో పిడుగుపాటుకు మహిళ మృతి

తెలంగాణలోని పలు జిల్లాల్లో నిన్న రాత్రి నుంచి భారీ వర్షాలు కురుస్తున్నాయి. ఈ వర్షాలకు నర్సాపూర్ మండలం తిరుమలాపూర్లో పిడుగుపాటుకు ఓ మహిళ మృతి చెందగా, ఆమె కుమారుడికి గాయాలయ్యాయి.

తూప్రాన్లో రోడ్లపై మోకాల లోతు వరద చేరడంతో వాహనదారులు ఇబ్బందులు పడ్డారు. సంగారెడ్డి, ఖమ్మం, జనగామ, వరంగల్, మహబూబాబాద్ జిల్లాల్లోనూ ఉరుములు, మెరుపులు, ఈదురుగాలులతో కూడిన వర్షం పడింది.

ఖమ్మం జిల్లాలో మధిర, చింతకాని మండలాల్లో కుండపోత వర్షం కురవడంతో, ఎల్లుండి జరగనున్న ముఖ్యమంత్రి రేవంత్ రెడ్డి సభ ఏర్పాట్లకు అంతరాయం కలిగింది. సభ వేదిక సమీపంలో నీరు చేరడంతో టెంట్లు, ఇతర సామగ్రి కొట్టుకుపోయాయి.

ఆదిలాబాద్, నిర్మల్ జిల్లాల్లో వర్షాలు పత్తి రైతులకు ఊరట కలిగించాయి. తొలుత విత్తనాలు మొలకెత్తకపోవడంతో ఆందోళన చెందిన రైతులు తాజా వర్షాలతో మళ్లీ విత్తనాలు నాటుతున్నారు. అయితే ఆదిలాబాద్ జిల్లాలోని 21 మండలాల్లో 12 మండలాల్లో లోటు వర్షపాతం నమోదైనట్లు అధికారులు తెలిపారు. వాతావరణ శాఖ ఈ రోజు కూడా వర్షాలు కురిసే అవకాశం ఉందని ప్రకటించడంతో రైతులు మరింత వర్షం కోసం ఎదురుచూస్తున్నారు.