తూర్పు గోదావరి, కోనసీమ, కాకినాడ జిల్లాలో భారీ వర్షం; లోతట్టు ప్రాంతాలు జలమయం, రైతులకు ఉపశమనం

తూర్పు గోదావరి, అంబేద్కర్ కోనసీమ, కాకినాడ జిల్లాల్లో బుధవారం ఉదయం 5 గంటల నుంచి భారీ వర్షం కురుస్తోంది. దీంతో పలు పట్టణాలు జలమయమయ్యాయి. రాజమహేంద్రవరం, కాకినాడ, అనపర్తి, రాజానగరం తదితర ప్రాంతాల్లో రోడ్లపై నీరు నిలిచింది. వాహనదారులు తీవ్ర ఇబ్బందులు ఎదుర్కొన్నారు. పాఠశాలలు, కళాశాలలకు వెళ్లే విద్యార్థులు, ఉద్యోగస్తులు రాకపోకలకు అంతరాయం ఏర్పడింది.

రాజమహేంద్రవరంలో రైల్వే స్టేషన్ రోడ్డు, కంబాల చెరువు, ఇన్కమ్ ట్యాక్స్ రోడ్డు, కృష్ణానగర్, కోరుకొండ రోడ్లు పూర్తిగా జలదిగ్బంధంలో ఉన్నాయి. కాకినాడలో ఆర్టీసీ బస్ స్టాండ్ ప్రాంగణం, రమణయ్యపేట, దుమ్ములపేట, సురేష్ నగర్ ప్రధాన రహదారులు నీట మునిగాయి. 50 డివిజన్లలో 48 డివిజన్లు జలమయమయ్యాయి. మున్సిపల్ అధికారులు వెంటనే రంగంలోకి దిగి డ్రైనేజీ వ్యవస్థను సరిచేసి నీటిని బయటకు పంపుతున్నారు.

నెలన్నర రోజుల నుంచి వర్షాలు లేక తీవ్రంగా నష్టపోతున్న రైతులకు ఈ వర్షాలు ఉపశమనం కలిగించాయి. విత్తనాలు నాటేందుకు తగిన తేమ లభించడంతో రైతులు సంతోషం వ్యక్తం చేస్తున్నారు. గోదావరి నది ప్రవాహం తగ్గి ధవళేశ్వరం బ్యారేజీ వద్ద గేట్లు మూసివేశారు. ప్రస్తుతం 15,000 క్యూసెక్కుల వరద మాత్రమే వస్తోంది. వర్షపాతం గత కొద్ది రోజుల్లో గణనీయంగా తగ్గి, సాధారణం కంటే 50 శాతం మాత్రమే నమోదైందని అధికారులు తెలిపారు. ప్రస్తుతం వర్షం కొనసాగుతోంది, ఎడతెరిపి లేని వర్షాలతో లోతట్టు ప్రాంతాలు ఇంకా జలమయంగా ఉండవచ్చని అంచనా.