కాంగ్రెస్ నేతలపై KTR తీవ్ర విమర్శలు: ఉద్యోగాల హామీలపై లెక్కలు తప్పాయి

తెలంగాణ కాంగ్రెస్ ప్రభుత్వం ఉద్యోగాల విషయంలో అబద్ధపు లెక్కలు చెప్తోందని BRS నేత KTR తీవ్రంగా విమర్శించారు. శాసనసభలో కాంగ్రెస్ ప్రభుత్వం స్వయంగా కేవలం 16,978 ఉద్యోగాలు మాత్రమే ఇచ్చామని చెప్పిందని, అందులో రీ నోటిఫికేషన్లు తీసేస్తే రెండున్నర సంవత్సరాల్లో పదివేల ఉద్యోగాలు కూడా ఇవ్వలేదని KTR పేర్కొన్నారు.

కాంగ్రెస్ నేతలు ఒక్కొక్కరు ఒక్కో విధంగా ఉద్యోగాల సంఖ్యలు చెప్తున్నారని, కనీసం అబద్ధం ఆడే విషయంలోనైనా ట్రైనింగ్ ఇవ్వలేదని KTR వ్యంగ్యంగా విమర్శించారు. ఇప్పుడు కాకి లెక్కలు అనే మాటను కాంగ్రెస్ లెక్కలు అని పిలవాల్సిన పరిస్థితి వచ్చిందని ఆగ్రహం వ్యక్తం చేశారు.

కాలేజీ విద్యార్థినులకు స్కూటీలు ఇస్తామని హామీ ఇచ్చిన కాంగ్రెస్ నేతలు ఆ వాగ్దానాన్ని నెరవేర్చలేదని KTR అన్నారు. నోటిఫికేషన్లు లేవు కానీ భూముల లూటీ, బూడిద లూటీ, ఇసుక లూటీ, బొగ్గు లూటీ మాత్రం జోరుగా సాగుతోందని ఆరోపించారు.

20,000 పోలీసు ఉద్యోగాల ఖాళీలు నింపాలని నిరుద్యోగులు అడిగితే ముఖ్యమంత్రి రేవంత్ రెడ్డి అవమానకరంగా మాట్లాడారని KTR ధ్వజమెత్తారు. KCR హయాంలో 48,000 పోలీసు ఉద్యోగాలు ఇచ్చిన విషయాన్ని గుర్తు చేశారు.

నిరుద్యోగులకు, రైతులకు అవమానకరమైన మాటలు మాట్లాడే రేవంత్ రెడ్డి అహంకారాన్ని తెలంగాణ యువత మరవదని KTR హెచ్చరించారు. ఎన్నికలు వచ్చినప్పుడు మళ్ళీ గారడీ చేయాలని అనుకుంటున్నారా అని ప్రశ్నిస్తూ, తెలంగాణ పిల్లలు సామాన్యమైన వారు కాదని స్పష్టం చేశారు.