రావణ్ కేసు: గమన, ఇంద్రసేనాచౌదరికి మూడో రోజు విచారణ

YouTuber జోసెఫ్ అలియాజర్ (రావణ్) కేసులో గమన, ఇంద్రసేనా చౌదరి లకు మూడో రోజు విచారణ ఎదురైంది. ఈరోజు ఉదయం 11 గంటల ప్రాంతంలో వీరు గన్నవరం DSP కార్యాలయానికి చేరుకుని విచారణకు హాజరయ్యారు.

నిన్న (రెండో రోజు) పెనమలూరు పోలీస్ స్టేషన్‌లో ఉదయం నుంచి సాయంత్రం వరకు విచారణ జరిగింది. ఈ రోజు కూడా సాయంత్రం వరకు విచారణ కొనసాగే అవకాశం ఉంది. వీరిద్దరినీ వేర్వేరుగా ప్రశ్నిస్తున్నారు.

పోలీసులు ఈ కేసుకు సంబంధించిన ఆర్థిక లావాదేవీలపై ప్రధానంగా దృష్టి పెట్టారు. గమన ఒక YouTube ఛానల్ CEO గా ఉండగా, ఇంద్రసేనా చౌదరికి ఒక భవనాన్ని ఉచితంగా ఇచ్చినట్లు సమాచారం. ఈ లావాదేవీల వెనుక ఏమైనా కుట్ర ఉందా, ఆర్థిక సహాయం ఎవరు చేస్తున్నారు, కంటెంట్ ఎవరు సూచిస్తున్నారనే విషయాలపై పోలీసులు ఆరా తీస్తున్నారు.

ఈ ముగ్గురు కలిసి మత విద్వేషాలు రెచ్చగొట్టే కంటెంట్ చేస్తున్నారా, ప్రసంగాలు చేస్తున్నారా అనే కోణంలోనూ విచారణ జరుగుతోంది. ఇరువురు చాలా ప్రశ్నలకు సమాధానం దాటవేస్తున్నారని, కొన్ని ప్రశ్నలకు మాత్రమే బదులిస్తున్నారని పోలీసు వర్గాలు తెలిపాయి. వీరి ఫోన్లను స్వాధీనం చేసుకుని ఫోరెన్సిక్ ల్యాబ్ కు పంపించారు. డేటా రికవరీ అయితే కీలక ఆధారాలు లభించవచ్చని పోలీసులు భావిస్తున్నారు.

ఈరోజు ప్రత్యేక ప్రశ్నావళి తయారు చేసి, డేటా, కుట్ర కోణాలపై విచారణ చేపట్టారు. ఈ కేసులో పోలీసుల దర్యాప్తు కొనసాగుతోంది.