దేశంలో భారీ వర్షాలు: ముంబైలో భవనం కూలి 6 మంది మృతి; పుణె, జమ్మూకాశ్మీర్లో కొండచరియలు

దేశంలోని పలు రాష్ట్రాల్లో భారీ వర్షాలు కురుస్తున్నాయి. మహారాష్ట్ర, జమ్మూ కాశ్మీర్, ఉత్తరాఖండ్ తదితర రాష్ట్రాల్లో జనజీవనం అస్తవ్యస్తంగా మారింది.

ముంబైలోని ఓల్డ్ బంగ్లా ప్రాంతంలో భారీ వర్షాలకు ఒక భవనం కూలింది. ఈ ఘటనలో ఆరుగురు మృతి చెందారు. వీరిలో ఐదుగురు చిన్నారులు. అధికారులు వెంటనే స్పందించి జనాలను సురక్షిత ప్రదేశాలకు తరలించారు. వర్షాల వల్ల పాఠశాలలకు సెలవు ప్రకటించారు. రోడ్లపై నీరు నిలిచి ట్రాఫిక్‌కు అంతరాయం ఏర్పడింది.

పుణె-ముంబై మార్గంలో కొండచరియలు విరిగి పడ్డాయి. బండరాళ్లు రోడ్డుపై పడడంతో రవాణా నిలిచిపోయింది. రైలు పట్టాలకు ప్రమాదం ఉందని కొన్ని రైళ్లను నిలిపివేశారు.

జమ్మూ కాశ్మీర్లో క్లౌడ్‌బరస్ట్ సంభవించింది. రాళ్లు, బురద వరద నీటితో పాటు రోడ్లపైకి వచ్చాయి. ఉత్తరాఖండ్లో నదులు పొంగిపొర్లుతున్నాయి. ఛత్తీస్‌గఢ్, మధ్యప్రదేశ్, అసోం, కేరళ, ఒడిశాల్లోనూ భారీ వర్షాలు కొనసాగుతున్నాయి.

ఇదిలా ఉండగా, తెలంగాణలో మాత్రం జూన్, జూలై నెలలో సరైన వర్షం పడలేదు. పంటలు ఎండిపోయే పరిస్థితి నెలకొంది. రైతులు వర్షం కోసం ఆకాంక్షిస్తున్నారు.