హైదరాబాద్ ఫ్లై ఓవర్ల వద్ద వాయు కాలుష్యం పెరుగుదల: PM2.5, PM10 స్థాయిలు ప్రమాదకరం

హైదరాబాద్ నగరంలో ఫ్లై ఓవర్ల వద్ద వాయు కాలుష్యం రోజురోజుకు పెరుగుతోందని నివేదికలు వెల్లడించాయి. ముఖ్యంగా గచ్చిబౌలి, మసప్ ట్యాంక్, మహిదీపట్నం, కూకట్పల్లి, మియాపూర్ ప్రాంతాల్లో గాలి నాణ్యత గణనీయంగా క్షీణించిందని అధికారులు తెలిపారు.

కేంద్ర పర్యావరణ మంత్రిత్వ శాఖ, స్టేట్ ఆఫ్ ఎన్విరాన్మెంట్ రిపోర్ట్, సెంటర్ ఫర్ సైన్స్ అండ్ ఎన్విరాన్మెంట్ (CSE) నివేదికల ప్రకారం ఫ్లై ఓవర్లపై ట్రాఫిక్ రద్దీ ఎక్కువగా ఉండే సమయాల్లో సూక్ష్మ ధూళి కణాలు (PM10, PM2.5) ప్రమాదకర స్థాయిలో నమోదవుతున్నాయి. వాహనాలు నిలిచిపోయినప్పుడు గాలి ప్రసరణ లేకపోవడం, బాక్స్ మాదిరి చాంబర్ లాంటి పరిస్థితి ఏర్పడి కాలుష్య కారకాలు అక్కడే పేరుకుపోతాయని పర్యావరణ నిపుణులు వివరించారు.

గచ్చిబౌలి బయోడైవర్సిటీ ఫ్లై ఓవర్ వద్ద టైర్ల రాపిడి వల్ల మైక్రో ప్లాస్టిక్లు వెలువడుతున్నట్లు నివేదికలు సూచించాయి. మసప్ ట్యాంక్, మెహదీపట్నం పై వంతెనల దగ్గర కార్సినోజెనిక్ కారకాలు ఎక్కువగా ఉంటున్నాయి. ఈ ప్రాంతాల్లో వాహనాల నుంచి వెలువడే నైట్రస్ ఆక్సైడ్స్, బెంజీన్ వంటి విష వాయువులు పెరుగుతున్నాయి.

ఈ కాలుష్య కణాలు ఊపిరితిత్తుల్లోకి ప్రవేశించి ఆస్తమా, క్యాన్సర్, గుండె జబ్బులకు కారణమవుతాయని వైద్య నిపుణులు హెచ్చరించారు. ఫ్లై ఓవర్లపై కూడా అదే ఆరోగ్య సమస్యలు ఏర్పడే ప్రమాదం ఉందని తెలిపారు. నగరంలో వాహనదారులు తగు జాగ్రత్తలు తీసుకోవాలని అధికారులు సూచించారు.