చేవెళ్ళలో మంత్రి శ్రీధర్ బాబు చేత అభివృద్ధి పనుల ప్రారంభం

తెలంగాణ ఐటీ శాఖ మంత్రి దుద్దిల్ల శ్రీధర్ బాబు చేవెళ్ల సెగ్మెంట్లో అభివృద్ధి పనులను ప్రారంభించారు.

శంకరపల్లి మున్సిపల్ పరిధిలోని బీడీఎల్ జంక్షన్ వద్ద రూ.75 లక్షల నగర అభివృద్ధి నిధులతో చేపట్టే పనులకు ఆయన శంకుస్థాపన చేశారు. అనంతరం చేవెళ్ల, షాబాద్ మండలాల్లో పలు అభివృద్ధి కార్యక్రమాలను ప్రారంభించారు.

మంత్రి శ్రీధర్ బాబు మాట్లాడుతూ, రాష్ట్ర ప్రభుత్వం పట్టణ ప్రగతికి, మౌలిక వసతుల కల్పనకు అత్యధిక ప్రాధాన్యత ఇస్తోందని చెప్పారు. రోడ్లు, సుందరీకరణ, రైతుల సంక్షేమం తమ ప్రాధాన్యతలని తెలిపారు. పెరుగుతున్న జనాభా అవసరాలకు అనుగుణంగా పట్టణాభివృద్ధి కొనసాగుతోందన్నారు.

ఈ ప్రాంతానికి పరిశ్రమలు తీసుకొచ్చేందుకు కృషి చేస్తున్నామని, వచ్చే పరిశ్రమల్లో స్థానిక యువతకు ఉద్యోగాల్లో ప్రాధాన్యత ఇస్తామని మంత్రి హామీ ఇచ్చారు. రైతుల పంటలకు మెరుగైన ధర లభించేలా అంతర్జాతీయ స్థాయి గిడ్డంగులు, మౌలిక వసతులు కల్పిస్తామన్నారు. పరిశ్రమల వల్ల స్థానిక ఆర్థిక వ్యవస్థ మెరుగుపడుతుందని ఆయన వివరించారు.

స్థానిక నాయకులు, ప్రజాప్రతినిధులు ఈ కార్యక్రమంలో పాల్గొన్నారు. పరిశ్రమల కోసం చెన్నపల్లి ప్రాంతంలో భూమి కావాలని ప్రతినిధులు కోరారు. వీటన్నింటిపై మంత్రి సానుకూలంగా స్పందించారు.