సంగారెడ్డి, మహబూబాబాద్, నిజామాబాద్ జిల్లాల్లో భారీ వర్షం

తెలంగాణలోని సంగారెడ్డి, మహబూబాబాద్, నిజామాబాద్ జిల్లాల్లో సోమవారం భారీ వర్షం కురిసింది. పలు ప్రాంతాల్లో వర్షం ధాటికి రోడ్లు జలమయమయ్యాయి. ఎండల తీవ్రతతో ఇబ్బంది పడుతున్న ప్రజలకు, రైతులకు ఈ వర్షం ఉపశమనం కలిగించింది.

సంగారెడ్డి జిల్లాలోని జహీరాబాద్, ముగుడంపల్లి, జురాసంగం, కొహిర్ మండలాలతోపాటు పర్వతాపురం, గోవిందపురం గ్రామాల్లో వర్షం బాగా పడింది. భారీ వర్షం కారణంగా వాగులు పొంగి ప్రవహించాయి. చాలా రోజుల తర్వాత వర్షం రావడంతో రైతులు ఆనందం వ్యక్తం చేశారు.

మహబూబాబాద్ జిల్లాలో కూడా భారీ వర్షం కురిసింది. దీంతో వాతావరణం చల్లబడింది. కానీ, పలు ప్రధాన రహదారులు జలమయమయ్యాయి. వాహనదారులు తీవ్ర ఇబ్బందులు ఎదుర్కొన్నారు.

నిజామాబాద్ జిల్లాలోని బోధన్ నియోజకవర్గంలోని ఎడవల్లి మండలం, బాన్సువాడ నియోజకవర్గంలోని బీర్కూర్, వర్ని మండలాల్లో వర్షం కురిసింది. ఈ వర్షానికి గాంధీ కూడలి వద్ద ఫ్లై ఓవర్ రోడ్డు, ఆర్టీసీ బస్టాండ్, ప్రాథమిక ఆరోగ్య కేంద్రం ఆవరణలో వర్షం నీరు చేరింది. డ్రైనేజీలు పొంగి రోడ్లపై నీరు నిలిచిపోయింది. రాకపోకలకు అంతరాయం కలిగింది.