తెలంగాణలో భారీ వర్షాలు: 12 జిల్లాలకు ఎల్లో అలర్ట్, రాకపోకలు స్తంభించాయి

వరంగల్, భద్రాద్రి కొత్తగూడెం, ఖమ్మం, సూర్యాపేట, యాదాద్రి భువనగిరి, నల్గొండ, నాగర్‌కర్నూల్, మహబూబ్‌నగర్, వనపర్తి, జోగులాంబ గద్వాల తదితర 12 జిల్లాల్లో ఇవాళ భారీ వర్షాలు కురిసే అవకాశం ఉందని వాతావరణ శాఖ ఎల్లో అలర్ట్ జారీ చేసింది. ఇప్పటికే అనేక ప్రాంతాల్లో ఎడతెరిపి లేకుండా వర్షం కురుస్తోంది.

ఆదిలాబాద్ జిల్లా జైనద్ మండలం తరోడా వద్ద నిర్మాణంలో ఉన్న హైవేపై తాత్కాలిక వంతెనపై వరద నీరు ప్రవహించడంతో ట్రాఫిక్ జామ్ ఏర్పడింది. ఇంద్రవెల్లిలో డైట్ కళాశాల, జట్పి ఉన్నత పాఠశాల ఆవరణల్లోకి నీరు చేరింది. తలమడుగు, భీంపూర్, సిరికొండ మండలాల్లోని పలు గ్రామాలకు రాకపోకలు నిలిచిపోయాయి. కరంజీటి గ్రామం చుట్టుముట్టింది. నిర్మల్ జిల్లా భయంసాలో 100 ఏళ్ల నాటి చెట్టు కూలడంతో పాటు పలు చోట్ల విద్యుత్ స్తంభాలు నేలకొరిగాయి, కుబీర్ మండలం పార్డిబిలో విద్యుత్ సరఫరా నిలిచిపోయింది. మంచిర్యాల జిల్లా మందమరిలో మూడు ఇళ్ళు కూలిపోయాయి, రోడ్లపై చెట్లు పడ్డాయి.

మూలుగు జిల్లా వాజేడు మండలంలో గోదావరి నది ఉదృతంగా ప్రవహిస్తోంది. ఇసుకవాగు సమీపంలో డైవర్షన్ రోడ్డు కొట్టుకుపోవడంతో రాకపోకలు నిలిచిపోయి, అధికారులు నాటుపడవల ద్వారా ప్రజలను తరలిస్తున్నారు. కుమరంభీం ఆసిఫాబాద్ జిల్లాలోని వట్టివాగు ప్రాజెక్టు నాలుగు గేట్లు, కుమరంభీం ప్రాజెక్టు ఆరు గేట్లు ఎత్తారు. ప్రాణహిత, పెన్‌గంగా నదులు ఉదృతంగా ప్రవహిస్తున్నాయి. సిర్పూర్ నియోజక వర్గంలో గత నాలుగు రోజులుగా కురుస్తున్న వర్షాల వల్ల వందల ఎకరాల్లో పంటలు మునిగిపోయాయి. బెజ్జూరు మండలం తలాయి గ్రామం వద్ద బ్యాక్ వాటర్ వచ్చి వేల ఎకరాల పంటలు నాశనమయ్యాయి. టేకుల గూడెం వద్ద NH163 పై వరద నీరు ప్రవహిస్తుండడంతో తెలంగాణ-ఛత్తీస్‌గఢ్ మధ్య రాకపోకలు నిలిచిపోయాయి. బొగత జలపాతం ప్రమాదకరంగా ప్రవహిస్తుండడంతో అధికారులు పర్యాటకుల ప్రవేశాన్ని నిలిపివేశారు.

జిల్లా యంత్రాంగం పరిస్థితిని ఎప్పటికప్పుడు పర్యవేక్షిస్తూ లోతట్టు ప్రాంతాల ప్రజలు అప్రమత్తంగా ఉండాలని, వరద ప్రవాహిత ప్రాంతాల్లోకి వెళ్లరాదని సూచిస్తోంది. అత్యవసర సహాయ చర్యలకు అధికారులు సిద్ధంగా ఉన్నారు.