హిమాయత్ సాగర్ పూర్తి స్థాయికి చేరడంతో ఒక గేటు ఎత్తివేత; దిగువ ప్రాంతాలకు అప్రమత్తం

హైదరాబాద్‌లోని హిమాయత్ సాగర్ జలాశయం పూర్తి స్థాయి నీటిమట్టానికి చేరుకుంది. దీంతో జలమండలి అధికారులు ఎనిమిదో నెంబర్ గేటును ఒక అడుగు మేర ఎత్తి నీటిని దిగువకు విడుదల చేశారు.

వికారాబాద్, తండూరు ప్రాంతాల్లో కురిసిన భారీ వర్షాల కారణంగా వరద నీరు భారీగా వచ్చి చేరడంతో ఈ పరిస్థితి ఏర్పడింది. అధికారులు ఈ నీటిని మూసీ నదిలోకి మళ్లించారు.

నీటి విడుదల సందర్భంగా రాజేంద్రనగర్ ఎమ్మెల్యే ప్రకాష్ గౌడ్ అధికారులతో కలిసి ప్రత్యేక పూజలు నిర్వహించారు. రానున్న రోజుల్లో వరద ఉద్ధృతి పెరిగితే మరిన్ని గేట్లు ఎత్తే అవకాశం ఉందని ఆయన తెలిపారు.

దిగువ ప్రాంతాల ప్రజలు అప్రమత్తంగా ఉండాలని, రెవెన్యూ, పోలీస్, జలమండలి అధికారులు ముందస్తు హెచ్చరికలు జారీ చేశారు. ప్రజలకు ఎలాంటి ఇబ్బంది లేకుండా చూడాలన్నదే ప్రభుత్వ ఆదేశమని ఎమ్మెల్యే వివరించారు.

ఈ వర్షాకాలంలో హిమాయత్ సాగర్ గేట్లు తొలిసారి తెరవడం ఇదే. గతేడాదితో పోలిస్తే ఈసారి ముందుగానే జలాశయం నిండింది. నీటి మట్టం ఎప్పటికప్పుడు పర్యవేక్షిస్తున్నామని అధికారులు తెలిపారు.