రెండు రాష్ట్రాల్లో డూప్లికేట్ ఓటు ఉన్నవారు ఎలా తొలగించాలి?

ఎన్నికల సంఘం నిర్వహిస్తున్న ప్రత్యేక సమీక్ష (Special Intensive Revision - SIR)లో డూప్లికేట్, దొంగ ఓట్లను తొలగించడమే లక్ష్యం. భారత ఎన్నికల చట్టం ప్రకారం ఒక వ్యక్తి తను నివసిస్తున్న నియోజకవర్గంలో మాత్రమే ఓటరుగా నమోదై ఉండాలి. ఆంధ్రప్రదేశ్, తెలంగాణా రెండు రాష్ట్రాల్లోనూ ఓటు కలిగి ఉండడం చట్టవిరుద్ధం.

మీరు స్వచ్ఛందంగా ఒకచోట ఓటును వదులుకోవడం ముఖ్యం. ఇంటికి వచ్చే ఎన్యుమరేటర్‌కు రెండు ఓట్ల విషయాన్ని చెబితే క్రిమినల్ కేసు నమోదు కాదు. అయితే, నిర్ణీత గడువు తర్వాత కూడా రెండు ఓట్లు కొనసాగిస్తే చట్టపరమైన చర్యలు తీసుకునే అవకాశం ఉంది.

డూప్లికేట్ ఓటు తొలగించుకోవడానికి మూడు మార్గాలు ఉన్నాయి. ఆన్‌లైన్‌లో ఓటర్ సర్వీస్ పోర్టల్‌కు మొబైల్ నెంబర్‌తో లాగిన్ అయ్యి, ఫారం-7 సెలక్ట్ చేసి, ఏ రాష్ట్రంలో ఓటు వదులుకోవాలో ఎంచుకుని సబ్మిట్ చేయాలి. ఆఫ్‌లైన్‌లో ఎలక్టోరల్ రిజిస్ట్రేషన్ ఆఫీసర్ (ERO) లేదా బూత్ లెవల్ ఆఫీసర్ (BLO)ని కలిసి ఫారం-7 సబ్మిట్ చేయవచ్చు. మొబైల్ ద్వారా ఈసీఐ ఓటర్ హెల్ప్‌లైన్ యాప్‌లో కూడా ఫారం-7 దరఖాస్తు చేసుకోవచ్చు.

ఆన్‌లైన్‌లో దరఖాస్తు చేసిన తర్వాత వచ్చే రిఫరెన్స్ నెంబర్‌తో అప్లికేషన్ స్థితిని ట్రాక్ చేయవచ్చు. ఎన్నికల శాఖ ఈ SIR ప్రక్రియను పూర్తి చేస్తున్నందున డూప్లికేట్ ఓట్లు తొలగించుకోవడం ప్రతి ఓటరు బాధ్యత.