రజినీకాంత్ 'జైలర్ 2'లో హృతిక్ రోషన్ అతిధి పాత్ర? చెన్నైలో జూన్ లో చిత్రీకరణ

బాలీవుడ్ నటుడు హృతిక్ రోషన్ రజినీకాంత్ 'జైలర్ 2' చిత్రంలో కీలకమైన అతిథి పాత్ర పోషించనున్నట్లు తెలుస్తోంది. ఈ చిత్రం విడుదల ఆగస్టు నుంచి సెప్టెంబర్‌కు, ఆ తర్వాత అక్టోబర్‌కు వాయిదా పడింది. రీషూట్ల పుకార్లు కూడా వినిపిస్తున్నాయి.

చిత్రం ఆలస్యానికి కారణం ప్రధానంగా ఒక అతిథి పాత్ర. షారుక్ ఖాన్ చేయాల్సిన ఆ పాత్ర నిర్ణయం ఇంకా పెండింగ్‌లో ఉంది. దీంతో మరో హీరో ఆ క్యారెక్టర్ చేయాల్సి రావడంతో విడుదల వెనక్కి వెళుతోంది.

సినీ వర్గాల సమాచారం ప్రకారం, హృతిక్ రోషన్ ఆ ఖాళీని భర్తీ చేయబోతున్నారు. 1986లో వచ్చిన 'భగవాన్ దాదా'లో చైల్డ్ ఆర్టిస్ట్‌గా రజినీతో కలిసి నటించారు. నాలుగు దశాబ్దాల తర్వాత తిరిగి ఇద్దరూ స్క్రీన్ పంచుకోబోతున్నారు.

ఈ పాత్ర కేవలం అతిథి పాత్ర మాత్రమే కాక, కథను మలుపు తిప్పే కీలక ఘట్టమని తెలుస్తోంది. దర్శకుడు నెల్సన్ దీనిని భారీ యాక్షన్ సీక్వెన్స్‌గా డిజైన్ చేస్తున్నారు. చెన్నైలో జూన్ మూడో వారంలో హృతిక్‌పై సన్నివేశాలు చిత్రీకరించనున్నారు.

ఈ పరిణామం 'జైలర్ 2'పై అంచనాలను మరింత పెంచింది. ఈ చిత్రం దక్షిణాదితో పాటు ఉత్తర భారత మార్కెట్‌ను లక్ష్యంగా చేసుకుంటోంది.