హైదరాబాద్‌లో 1,150 క్రాకర్స్ షాపులకు అనుమతులు, ఎన్టీఆర్ స్టేడియంలో సందడి

దీపావళి పండగ నేపథ్యంలో హైదరాబాద్ నగరవ్యాప్తంగా క్రాకర్స్ స్టాళ్లు ఏర్పాటయ్యాయి. నగరంలో మొత్తం 1,150 క్రాకర్స్ దుకాణాలకు ఫైర్ శాఖ తాత్కాలిక అనుమతులు ఇచ్చింది.

ఎన్టీఆర్ స్టేడియంలో దాదాపు 10 షాపులు ఏర్పాటు చేశారు. ఇక్కడ కుటుంబాలతో వచ్చిన వారు టపాకాయలు కొంటున్నారు.

ఫైర్ శాఖ అధికారుల సమాచారం ప్రకారం, మైదానాల ఆధారంగా పోలీస్, ఫైర్, రెవెన్యూ శాఖల అనుమతులు తీసుకున్న తర్వాతే తాత్కాలిక అనుమతులు ఇచ్చారు. షాపుల ఏర్పాటు, నిర్వహణ విధానాన్ని కూడా పరిగణనలోకి తీసుకున్నారు. షాపులపై అధికారులు ప్రత్యేక నిఘా పెట్టారు. ప్రమాదాలు జరగకుండా ముందస్తు జాగ్రత్తలు తీసుకుంటున్నారు.

ధరల విషయంలో ఈసారి కొంత పెరుగుదల ఉందని షాపు నిర్వాహకులు చెప్తున్నారు. ఒక కస్టమర్ తెలిపిన ప్రకారం, మిర్చి పటాకి ప్యాకెట్ ధర గత ఏడాది ₹25 ఉండగా ఈ ఏడాది ₹95కి చేరింది. మెడిసిన్ పటాకి, నైట్రోజన్ రాకెట్, స్కై షాట్స్ ఎక్కువగా కొంటున్నట్టు కస్టమర్లు చెప్పారు.

గత ఏడాదితో పోలిస్తే ఈసారి వ్యాపారం కొంత తగ్గిందని వ్యాపారులు చెప్తున్నారు. షాపుల సంఖ్య పెరగడం, ఆర్థిక ఇబ్బందులు కారణాలుగా వాళ్లు పేర్కొంటున్నారు. కొన్ని బ్రాండ్ల క్రాకర్స్ ధరలు కూడా పెరిగాయని నిర్వాహకులు తెలిపారు.