హైదరాబాద్ మార్కెట్లలో దీపావళి క్రాకర్స్ విక్రయాలు ప్రారంభం, ధరలు 20 శాతం పెరుగుదల

దీపావళి పండుగ కోసం హైదరాబాద్ మార్కెట్లలో క్రాకర్స్ స్టాళ్లు ప్రారంభమయ్యాయి. ఈసారి 200 కొత్త రకాల క్రాకర్స్ అందుబాటులో ఉన్నాయని విక్రేతలు చెప్తున్నారు. చిన్న పిల్లల నుంచి పెద్దల వరకు కొనుగోళ్లు చేస్తున్నారు.

గత సంవత్సరంతో పోలిస్తే ఈసారి ధరలు దాదాపు 20 శాతం పెరిగాయని వ్యాపారులు తెలిపారు. GST పెరుగుదల, GHMC లైసెన్స్ ఛార్జీలు ఎక్కువ కావడం ధరల పెరుగుదలకు కారణమని వారు చెప్పారు. ఒక్కో ఐటమ్ ధర ₹10 నుంచి ₹2000-3000 వరకు ఉంది.

స్టాళ్లలో చిచ్చుబుట్లు, కాకరవత్తులు, రాకెట్లు, లక్ష్మీ బాంబులు, భూచక్రాలు ఉన్నాయి. సినిమా స్టైల్, రాజకీయ పార్టీల పేర్లతో ఉన్న క్రాకర్స్ కూడా కనిపిస్తున్నాయి. YSRCP, జనసేన పేర్లతో ఉన్న ఐటమ్స్ కూడా విక్రయిస్తున్నట్టు విక్రేతలు చెప్పారు.

ఈ ఏడాది 44 దరఖాస్తులు వచ్చినా, స్థలం సరిపోక 16 స్టాళ్లకే అనుమతి ఇచ్చినట్టు నిర్వాహకులు తెలిపారు. రెండు రోజుల క్రితమే అమ్మకాలు మొదలయ్యాయి. వారాంతంలో కొనుగోళ్లు ఎక్కువ ఉంటాయని, దీపావళి వరకు విక్రయాలు కొనసాగుతాయని వారు చెప్పారు.

ఇప్పటివరకు స్పార్క్స్ ఎక్కువగా అమ్ముడయ్యాయని ఒక విక్రేత తెలిపారు. దేవుళ్ల పేర్లతో ఉన్న బాంబులను కొనవద్దని, పేల్చవద్దని ఆయన కోరారు. మొత్తం వ్యాపారం గత ఏడాదితో పోలిస్తే కొంత తగ్గిందని ఆయన చెప్పారు.