హైదరాబాద్ అపార్ట్‌మెంట్లలో బోర్లు ఎండిపోయి నీటి కష్టాలు: రోజుకు ఒకే ట్యాంకర్

హైదరాబాద్‌లో ఎల్ నినో ప్రభావం, భూగర్భ జలాలు పడిపోవడంతో అపార్ట్‌మెంట్లలో నీటి కష్టాలు తీవ్రమవుతున్నాయి. రాజేంద్రనగర్ పరిధిలోని సన్ సిటీ ప్రాంతంలో ఉన్న అపార్ట్‌మెంట్లలో బోర్లు ఎండిపోయాయి. వాటర్ బోర్డు రోజుకు ఒకే ట్యాంకర్ ఇస్తోందని నివాసులు చెప్తున్నారు.

భాగ్యనగర్ కాలనీలోని విజయ వినాయక రెసిడెన్సీలో రెండు బోర్లు ఉన్నాయి. అందులో 1,000 అడుగుల లోతున్న బోరు పూర్తిగా ఎండిపోయింది. 650 అడుగుల బోరు 10 నుంచి 15 నిమిషాలు మాత్రమే నీరు ఇస్తోంది. ఆ నీటిని కూడా గంట నుంచి గంటన్నర వరకు వెయిట్ చేసిన తర్వాత తీసుకోవాల్సి ఉంటుందని నివాసి తెలిపారు. ఈ అపార్ట్‌మెంట్‌లో 14 ఫ్లాట్లు ఉండగా, 25 నుంచి 30 మంది నివసిస్తున్నారు. వాచ్‌మెన్ బోరు ఆన్ చేసినా 10 నిమిషాల తర్వాత ఆపేయాల్సి వస్తోంది. ఒక్కోసారి అరగంట తర్వాత మళ్లీ ఆన్ చేస్తున్నారు.

వాటర్ బోర్డు ట్యాంకర్ ఒకటి డెలివరీ అయిన తర్వాత మళ్లీ 24 గంటల వరకు ట్యాంకర్ రాదని నివాసులు చెప్తున్నారు. దీంతో ప్రైవేట్ ట్యాంకర్లపై ఆధారపడాల్సి వస్తోంది. ప్రైవేట్ ట్యాంకర్లు ఒక రోజు నుంచి మూడు రోజుల వరకు ఆలస్యం అవుతున్నాయని, డబ్బులు ఇచ్చినా సమయానికి నీరు రావడం లేదని వారు చెప్తున్నారు. డిమాండ్ పెరగడంతో ప్రైవేట్ ట్యాంకర్లు ఎక్కువ రేటు చెప్తున్నాయని తెలిపారు. నెలకు ₹2,000 ఉన్న maintenance ఛార్జీలను ₹4,000కు పెంచాల్సి వస్తుందా అని ఆలోచిస్తున్నట్టు ఒక నివాసి తెలిపారు.

ఔటర్ రింగ్ రోడ్డు లోపలి ప్రాంతాల్లో ఈసారి సుమారు 27% వర్షపాతం లోటు ఉందని భూగర్భ జల శాఖ అధికారులు చెప్తున్నారు. నగరంలో సగటున 10 మీటర్ల మేర భూగర్భ జల మట్టం పడిపోయింది. రాజేంద్రనగర్, సన్ సిటీ తదితర ప్రాంతాల్లో 11 నుంచి 12 మీటర్ల వరకు పడిపోయిందని అధికారులు తెలిపారు. గతంలో 400 నుంచి 500 అడుగుల్లో బోర్లు వేసి అవసరాలు తీర్చుకున్నారని, ఇప్పుడు ఎంత లోతుగా బోరు వేసినా నీరు రావడం లేదని నివాసులు చెప్తున్నారు.

సింగూరు జలాశయంలో నీరు అయిపోయిందని ప్రభుత్వం చెప్తోంది. నగరానికి అవసరమయ్యే సుమారు 20% నీరు అక్కడి నుంచే వస్తుంది. డిసెంబర్ 15 నాటికి అక్కడి నుంచి నీరు వస్తుందని, జంట జలాశయాలు, కృష్ణా-గోదావరి నీటితో సర్దుబాటు చేసుకోవాలని ప్రభుత్వం చెప్తోంది.

నిజాం కాలంలో గొలుసుకట్టు పద్ధతిలో సుమారు 2,600 చెరువులు తవ్వించారని, ప్రస్తుతం అందులో సుమారు 1,400 మాత్రమే మిగిలాయని స్థానికులు చెప్తున్నారు. చెరువులు ఆక్రమణలకు గురైనందున వర్షపు నీరు భూమిలో ఇంకే పరిమాణం తగ్గిపోయిందని వారు అంటున్నారు. జనవరి, ఫిబ్రవరి నెలలు దాటే వరకు ప్రభుత్వం నీటి సరఫరాపై ప్రత్యేక శ్రధ్ధ తీసుకోవాలని నివాసులు కోరుతున్నారు.