హైదరాబాద్‌లో 5,000 బోర్లు ఎండిపోయాయి: నీటి సంరక్షణపై మంత్రి పొన్నం పిలుపు

హైదరాబాద్‌లో గత కొన్ని రోజులుగా కురవాల్సిన వర్షాలు లేకపోవడంతో భూగర్భ జలాలు అడుగంటాయి. నగరంలో సుమారు 4,000 నుంచి 5,000 బోర్లు ఎండిపోయాయని ఇంచార్జి మంత్రి పొన్నం ప్రభాకర్ తెలిపారు. ఎల్‌నినో ప్రభావంతో వర్షాభావం తీవ్రంగా ఉందని, నీటి ఎద్దడి ఏర్పడే అవకాశం ఉందని వాతావరణ శాఖ, మెట్రో వాటర్ బోర్డు అధికారులు హెచ్చరిస్తున్నారు.

సైఫాబాద్‌లోని యూనివర్సిటీ కాలేజ్ ఆఫ్ సైన్స్‌లో మెట్రో వాటర్ బోర్డు నిర్వహించిన వర్షపు నీటి సంరక్షణ అవగాహన కార్యక్రమంలో మంత్రి పాల్గొన్నారు. ఈ సందర్భంగా కాలేజీ ఆవరణలో ఎండిపోయిన బోర్వెల్‌ను రీచార్జ్ పిట్‌గా మార్చి, దాన్ని ప్రారంభించారు. ప్రతి ఇంటి నుంచి వచ్చే రూఫ్ వాటర్ లేదా వాటర్ ప్లాంట్ వేస్ట్ వాటర్‌ను బోరు పక్కన మళ్లించడం ద్వారా ఎండిపోయిన బోర్లకు పునర్జీవం కల్పించవచ్చని ఆయన వివరించారు.

హైదరాబాద్‌లో ఇప్పటికే 3,500 నుంచి 4,000 బోర్లను ఇంజెక్షన్ బోర్వెల్స్‌గా మార్చినట్లు మంత్రి చెప్పారు. నగరంలో నీటి సంరక్షణకు ప్రతి ఇంటి యజమాని, అపార్ట్‌మెంట్ కాంప్లెక్స్‌లు, విద్యా సంస్థలు ముందుకు రావాలని పిలుపునిచ్చారు. 2016 నుంచి హైదరాబాద్ మున్సిపల్ అనుమతుల్లో వాటర్ హార్వెస్టింగ్ విధానం తప్పనిసరి చేసినట్లు గుర్తుచేశారు.

ఎల్‌నినో కారణంగా తెలంగాణలో వర్షపాతం సాధారణం కంటే తక్కువగా నమోదవుతోంది. నీటి చుక్కను కూడా వృధా చేయకుండా, ప్రతి వర్షపు చుక్కను భూగర్భ జలంగా మార్చే ఉద్యమంలో భాగస్వామ్యం కావాలని ప్రజలను కోరారు.