హైదరాబాద్‌లో 22 హోటళ్లపై ఫుడ్ సేఫ్టీ దాడులు.. 14 హోటళ్లకు వ్యాపార నిలిపివేత ఆదేశాలు

గ్రేటర్ హైదరాబాద్ పరిధిలో ఫుడ్ సేఫ్టీ అధికారులు ఒకేసారి 22 హోటళ్లపై దాడులు నిర్వహించారు. వీటిలో 14 హోటళ్ల వ్యాపారాన్ని నిలిపివేయాలని ఆదేశాలు జారీ చేశారు. మరికొన్ని హోటళ్లకు షోకాస్ నోటీసులు ఇచ్చారు.

దాడుల్లో ఎక్స్‌పైరీ అయిన మసాలాలు, నాణ్యత లేని మాంసం, పరిశుభ్రత లోపాలు అధికారులకు కనిపించాయి. కొన్ని హోటళ్లలో ఎలుకలు, బొద్దింకలు ఉన్నట్టు గుర్తించారు. నాణ్యత లోపాలున్న హోటళ్ల లైసెన్సులను రద్దు చేసినట్టు అధికారులు తెలిపారు.

ఫిర్యాదులు ఎక్కువగా బిర్యానీ హోటళ్లపై వస్తున్నాయి. దీర్ఘకాలం డీప్ ఫ్రీజర్‌లో నిల్వ చేసిన మాంసాన్ని వంటల్లో వాడుతున్నట్టు అధికారులు గుర్తించారు. హైదరాబాద్ బిర్యానీకి దేశవ్యాప్తంగా ప్రత్యేక గుర్తింపు ఉంది. గతంలో హైదరాబాద్ పోలీసులు ఇలాంటి నిల్వ కేంద్రాలపై దాడులు చేసి మాంసాన్ని స్వాధీనం చేసుకున్నారు. సంబంధిత వ్యక్తులపై కేసులు కూడా నమోదు చేశారు.

దాడులు జరిగిన కొన్ని హోటళ్ల ముందు యాజమాన్యాలు 'రినోవేషన్ పనులు జరుగుతున్నాయి' అని బ్యానర్లు పెట్టాయి. ఆ బ్యానర్లలో వ్యాపారం నిలిపివేతకు గల కారణాన్ని పేర్కొనలేదు.

మళ్లీ నియమాలు ఉల్లంఘిస్తే క్రిమినల్ కేసులు నమోదు చేసి జైలుకు పంపిస్తామని అధికారులు హెచ్చరించారు. మొదట షోకాస్ నోటీసులు, ఆ తర్వాత లైసెన్స్ రద్దు చర్యలు తీసుకుంటున్నట్టు వారు వివరించారు. రాబోయే రోజుల్లోనూ ఇలాంటి తనిఖీలు కొనసాగుతాయని తెలిపారు.

ఆహారంలో నాణ్యత లోపాలు కనిపిస్తే సంబంధిత అధికారులకు ఫిర్యాదు చేయాలని ఫుడ్ సేఫ్టీ అధికారులు కోరారు. లోపాలు బయటపడితే చర్యలు తీసుకుంటామని హైదరాబాద్ పోలీసులు కూడా తెలిపారు.