హైదరాబాద్: 2018 హత్య కేసులో నలుగురు రౌడీషీటర్లకు జీవిత ఖైదు

2018లో హైదరాబాద్ పాతబస్తీలోని మీరాలం ఫిల్టర్ దగ్గర జరిగిన షరీఫ్ హత్య కేసులో నలుగురు రౌడీషీటర్లకు నాంపల్లి కోర్టు జీవిత ఖైదు విధించింది. కాలాపతర్ పోలీస్ స్టేషన్ పరిధిలో నమోదైన ఈ కేసులో దాదాపు ఎనిమిదేళ్ల పాటు విచారణ జరిగింది.

పోలీసుల కథనం ప్రకారం, 2018లో షరీఫ్ కళ్లలో కారం కొట్టి, ఆ తర్వాత ఆయనను హత్య చేశారు. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని ఉస్మానియా ఆస్పత్రికి తరలించారు. మృతుడి సోదరుడు మొహమ్మద్ షరీఫ్ ఇచ్చిన ఫిర్యాదు మేరకు కేసు నమోదు చేశారు. నిందితులపై పలు పోలీస్ స్టేషన్లలో రౌడీషీట్లు ఉన్నట్టు అప్పట్లోనే గుర్తించారు.

ఈ హత్య వెనుక 2011 ఘటన ఉంది. మీరాలం చెరువులో షరీఫ్, ఆయన స్నేహితుడు మోయిజ్ బోటింగ్ కు వెళ్లారు. చెరువు మధ్యలో మోయిజ్ మునిగిపోయారు. షరీఫ్ కాపాడే ప్రయత్నం చేసినా సాధ్యం కాలేదు. మోయిజ్ మరణానికి షరీఫ్ కారణమని ఆయన కుటుంబం భావించింది. 2011 నుంచి 2018 మధ్య షరీఫ్‌పై హత్య ప్రయత్నాలు జరిగినట్టు పోలీసులు తెలిపారు.

కాలాపతర్ పోలీసులు సాంకేతిక ఆధారాలు సేకరించి, కోర్టులో ఎనిమిదేళ్ల పాటు కేసు వాదించారు. సాక్ష్యాలన్నీ పరిశీలించిన అనంతరం కోర్టు నలుగురికి జీవిత ఖైదు విధించింది. బాధితుడికి న్యాయం జరిగిందని పోలీసులు తెలిపారు.

బాధితుడి కుటుంబ సభ్యుడు మహమ్మద్ బిలాల్ మాట్లాడుతూ, తమకు న్యాయం జరిగిందని చెప్పారు. అయితే జీవిత ఖైదు కాకుండా ఉరిశిక్ష విధించి ఉంటే బాగుండేదని ఆయన అభిప్రాయపడ్డారు.